एभरेस्ट स्कुलका ५१ विद्यार्थी स्काउटमा दीक्षित

विराटनगर । विराटनगर–५ स्थित एभरेस्ट सेकेन्डरी स्कुलको एभरेस्ट स्काउट ट्रुपले बुधबार एक विशेष समारोहका बीच ५१ जना विद्यार्थीलाई दीक्षित गरेको छ । नेपाल स्काउट कोशी प्रदेशका प्रमुख आयुक्त हेमन्त भण्डारीको प्रमुख आतिथ्ययतामा सो दीक्षान्त समारोह सम्पन्न भएको हो ।

समारोहमा सदस्यता तहका ३० छात्रा र १० छात्र गरी ४० जना तथा बीपी पीक तहका ११ जना विद्यार्थी दीक्षित भएका हुन् । दीक्षित विद्यार्थीहरूलाई स्काउट लिडरहरूले शपथ ग्रहण गराएका थिए ।

Advertisement

दीक्षान्त समारोहलाई सम्बोधन गर्दै प्रमुख अतिथि भण्डारीले स्काउटको पहिचान स्कार्फ र युनिफर्ममा मात्र सीमित नहुने बताए । उनले भने, ‘स्काउटले अनुशासन, मेहनत, संस्कार र सहयोगको भावना व्यवहारमा देखाउनुपर्छ । स्काउटमा लागेका विद्यार्थीले आफ्नो अध्ययनलाई अब्बल बनाउँदै दैनिक कम्तीमा एउटा असल काम गर्नुपर्छ ।’

विद्यालयका प्रिन्सिपल तथा एभरेस्ट ट्रुपका इकाई अध्यक्ष टीकाराम पुरीको अध्यक्षतामा भएको कार्यक्रममा उनले स्काउटलाई जीवनोपयोगी सीप सिकाउने थलोको रूपमा व्याख्या गरे । प्रिन्सिपल पुरीले समय, भूगोल र आवश्यकता अनुसारका नयाँ सीपमूलक कार्यक्रम ल्याउन स्काउट नेतृत्वलाई आग्रह गर्दै विद्यार्थीको सर्वाङ्गीण विकासका लागि विद्यालयले सदैव सहयोग गर्ने प्रतिबद्धता जनाए ।

कार्यक्रममा स्काउटका स्थानीय तह प्रमुख नवीन पहाडी, विद्यालयका भाइस प्रिन्सिपल कुन्दन पुरी, नेपाल पत्रकार महासंघ कोशीका कोषाध्यक्ष सुदीप कोइराला र अतिरिक्त क्रियाकलाप इन्चार्ज सुधा डंगोल लगायतको उपस्थिति थियो । एभरेस्ट स्कुलमा हाल ८६ जना विद्यार्थी स्काउटमा आबद्ध रहेको जानकारी सो अवसरमा दिइएको थियो ।