एभरेस्ट कलेजमा  ‘साइन्स सेमिनार’ सम्पन्न

विराटनगर । विराटनगरको एभरेस्ट कलेजले विद्यार्थीहरूमा वैज्ञानिक दृष्टिकोण, सृजनशीलता र खोज अनुसन्धानको भावना विकास गर्ने उद्देश्यले  ‘साइन्स सेमिनार’ आयोजना गरेको छ ।

बिहीबार आयोजित सो सेमिनारमा विद्यार्थीहरूले विज्ञान र प्रविधिका नवीन तथा रोचक विषयहरूमा आफ्ना प्रस्तुतिहरू दिएका थिए । शिक्षण सिकाइलाई कक्षा कोठाको पाठ्यक्रममा मात्र सीमित नगरी व्यवहारिक प्रयोगसँग जोड्ने कलेजको अभियानअन्तर्गत यो कार्यक्रम आयोजना गरिएको हो । सेमिनारमा विद्यार्थीहरूले आफ्ना जिज्ञासा, सिर्जनात्मक क्षमता र वैज्ञानिक अन्वेषणलाई प्रस्तुत गर्ने अवसर पाएका थिए ।

Advertisement

कार्यक्रमको शुभारम्भ गर्दै कलेजका प्राचार्य टीकाराम पुरीले विद्यार्थी नै शैक्षिक क्षेत्रका मुख्य सरोकारवाला भएको उल्लेख गरे । उनले भने, ‘विद्यार्थीले आफ्नो लक्ष्य प्राप्तिका लागि अन्तर हृदयदेखि मेहनत गर्नुपर्छ । कलेज, शिक्षक र अभिभावकले केवल सहजीकरणको भूमिका मात्र निर्वाह गर्ने हो ।’ यो सेमिनार शिक्षकको नभई विद्यार्थीहरूकै विशेष कार्यक्रम भएको र यसले उनीहरूको ज्ञान र सीप विकासमा ठुलो सहयोग पुग्ने उनले विश्वास व्यक्त गरे ।

सेमिनारमा विद्यार्थीहरूले ७ वटा विभिन्न समूहमा विभाजन भई विज्ञानका विविध आयाममा प्रस्तुति दिएका थिए । जस अन्तर्गत आर्जन बराल र जेसिज गेलालले ‘स्पेस टाइम’, आदित्य पघैया र प्रज्जवल श्रेष्ठले  ‘ह्युमन ब्रेन’ तथा स्नेहा कोइराला, मानश्वी कोइराला, इच्छा बज्राचार्य र समीप खनालले  ‘न्यूक्लीयर इनर्जी’ सम्बन्धी तथ्यहरू प्रस्तुत गरे ।

त्यसैगरी, कृति गोयल, सौमिका ढकाल र प्रिन्सी वर्माले  ‘माइक्रो प्लास्टिक’ को प्रभाव, रायन पोखरेल, प्रेम खतिवडा, निश्चल न्यौपाने र रियोज मास्केले  ‘बियोन्ड द स्क्रिन’ शीर्षकमा आफ्ना प्रस्तुति राखेका थिए । अदिमहाङ्ग राई र मन्नत वर्माले  ‘द एलकेमी अफ फ्रिक्वेन्सी’ र विवश बरालले ‘अण्डा’ मार्फत विज्ञानका रोचक सिद्धान्तहरूलाई प्रस्ट पारेका थिए ।

आजको युग विज्ञान र प्रविधिको युग भएकाले शिक्षा, स्वास्थ्य, कृषि र सञ्चार जस्ता क्षेत्रमा भइरहेका परिवर्तनलाई आत्मसाथ गर्न यस्ता प्रयोगात्मक सिकाइ आवश्यक रहेको कलेजले जनाएको छ । सैद्धान्तिक ज्ञानलाई प्रयोग, अवलोकन र अनुसन्धानसँग जोड्दा विद्यार्थीको सिकाइ थप प्रभावकारी हुने र उनीहरूलाई पाठ्यपुस्तकभन्दा बाहिर गएर सोच्न प्रेरित गर्ने अपेक्षा कलेजले राखेको छ ।