बहुमतको विवादमा बास्तोला बर्खास्त

काठमाडौं । नेपाल कम्युनिस्ट पार्टी (बहुमत)ले अध्यक्ष मण्डलका अध्यक्ष धर्मेन्द्र बास्तोला ‘कञ्चन’लाई पार्टीको सम्पूर्ण जिम्मेवारीबाट बर्खास्त गरेको छ ।

पार्टीभित्र लामो समयदेखि देखिँदै आएको आन्तरिक विवाद उत्कर्षमा पुगेपछि केन्द्रीय समितिको विशेष बैठकले बास्तोलामाथि कारबाही गरेको हो । बहुमतको विवादलाई लिएर बास्तोला बर्खास्तमा परेपछि यो विषयले चर्चा पाएको छ ।

Advertisement

केन्द्रीय समितिको सोमबार बसेको विशेष जुम बैठकले बास्तोलालाई अध्यक्ष मण्डलको अध्यक्षसहित पार्टीका सबै जिम्मेवारीबाट हटाउने निर्णय गरेको पार्टीले जनाएको छ । बैठकपछि जारी संयुक्त विज्ञप्तिमा बास्तोलामाथि स्वेच्छाचारी गतिविधि, सांगठनिक अराजकता र पार्टी अनुशासनविपरीत काम गरेको आरोप लगाइएको छ ।

पार्टीले राष्ट्रिय सम्मेलन एकल निर्णयका आधारमा स्थगित गर्न खोजेको, पार्टीभित्र प्रस्तुत फरक दस्तावेज अस्वीकार गरेको तथा सैद्धान्तिक र वैचारिक बहसबाट पन्छिएको आरोप पनि बास्तोलामाथि लगाएको छ । लामो समयदेखि उनका गतिविधि गैरमार्क्सवादी प्रकृतिका रहेको र पार्टी अनुशासन उल्लंघन गरेको दाबी पनि विज्ञप्तिमा गरिएको छ ।

पार्टीका अनुसार बास्तोला पछिल्लो समय संगठनभित्र अल्पमतमा पर्दै आएका थिए । उनको कारबाहीमा पार्टीसँग आबद्ध विभिन्न १२ वटा जनवर्गीय संगठन तथा मोर्चाहरूको समेत सहमति रहेको बताइएको छ ।

बास्तोलालाई हटाएपछि अध्यक्ष मण्डलका सदस्य तथा पार्टी प्रवक्ता दीपकलाई अध्यक्ष मण्डलको अध्यक्षको जिम्मेवारी दिइएको पार्टीले जनाएको छ । नेकपा (बहुमत)ले आगामी असोज ५ गते काठमाडौंमा राष्ट्रिय सम्मेलन गर्ने निर्णयसमेत गरेको छ । आन्तरिक विवादका बीच पार्टीले राष्ट्रिय सम्मेलनमार्फत संगठनात्मक तथा वैचारिक विषय टुंग्याउने तयारी गरेको देखिन्छ ।

यसैबीच, पार्टीले भोटेकोशीमा आएको बाढीबाट प्रभावित नागरिकका लागि उद्धार तथा राहत अभियान सञ्चालन गर्ने भएको छ । त्यसका लागि कृष्ण धमलाको नेतृत्वमा ‘बाढीपीडितको उद्धार तथा राहत समिति’ गठन गरिएको पार्टीले जनाएको छ ।