बाढी पीडितका तस्बिर र भिडियो सार्वजनिक गर्दा संवेदनशील बन्न आग्रह

काठमाडौं । सूचना तथा सञ्चारमन्त्री विक्रम तिमिल्सिनाले भोटेकोशी बाढीबाट प्रभावित नागरिकको पीडा र संवेदनशील अवस्थालाई समाचार बनाउँदा मानवीय मर्यादा, गोपनीयता र सुरक्षाको पूर्ण सम्मान गर्न सञ्चारमाध्यम तथा पत्रकारलाई आग्रह गरेका छन् । नुवाकोट र रसुवाका होल्डिङ सेन्टरमा सुत्केरी महिला, बालबालिका, आफन्त गुमाएका व्यक्ति तथा अन्य संवेदनशील अवस्थामा रहेका नागरिक आश्रय लिइरहेकाले उनीहरूको तस्वीर, भिडियो र व्यक्तिगत विवरण सार्वजनिक गर्दा विशेष सावधानी अपनाउन उनले आग्रह गरेका हुन् ।

मन्त्री तिमिल्सिनाले विपद्को वास्तविकता बाहिर ल्याउनु सञ्चारमाध्यमको महत्वपूर्ण दायित्व भए पनि पीडितको गोपनीयता, सुरक्षा र आत्मसम्मानको सम्मान गर्नु अझ महत्वपूर्ण जिम्मेवारी भएको बताए । सम्बन्धित निकायसँग समन्वय नगरी होल्डिङ सेन्टरमा प्रवेश नगर्न तथा उद्धार र राहत कार्यमा अवरोध नपुग्ने गरी समाचार संकलन गर्न पनि उनले आग्रह गरे ।

Advertisement

विशेषगरी बालबालिकाको पहिचान खुल्ने तस्वीर तथा भिडियो सहमतिबिना सार्वजनिक नगर्न र भयावह तथा हृदयविदारक दृश्य पोस्ट वा रिपोस्ट नगर्न मन्त्रालयले आग्रह गरेको छ । अपुष्ट तथा कृत्रिम बुद्धिमत्ता (एआई) बाट सिर्जित भ्रामक सामग्री नफैलाउन र विपद्सम्बन्धी समाचारमा गृह मन्त्रालय, जिल्ला प्रशासन, सुरक्षा निकाय तथा स्थानीय विपद् व्यवस्थापन समितिजस्ता आधिकारिक स्रोतलाई प्राथमिकता दिन पनि मन्त्रालयले अनुरोध गरेको छ ।