महासभामा तयारीका साथ प्रस्तुत हुन प्रधानमन्त्रीलाई सुझाव

काठमाडौं । नेपाली कांग्रेसका सभापति गगन थापाले प्रधानमन्त्री बालेन्द्र (बालेन) शाहलाई संयुक्त राष्ट्रसंघको महासभामा नेपालका मुद्दा तथ्य र प्रमाणसहित प्रभावकारी रूपमा प्रस्तुत गर्न सुझाव दिएका छन् ।

पार्टी केन्द्रीय कार्यालय सानेपामा आइतबार बसेको केन्द्रीय कार्यसम्पादन समितिको बैठकमा सभापति थापाले विशेषगरी जलवायु परिवर्तनका विषयमा पर्याप्त तयारी गरेर अन्तर्राष्ट्रिय मञ्चमा प्रस्तुत हुन प्रधानमन्त्रीलाई सुझाव दिएका हुन् । उनले प्रधानमन्त्रीको सचिवालयका सदस्यमा मात्र निर्भर नभई जलवायु परिवर्तनका क्षेत्रमा काम गरिरहेका विज्ञ, अनुसन्धानकर्ता तथा विभिन्न संघसंस्थासँग समन्वय गरेर आवश्यक तथ्य र प्रमाण जुटाउन आग्रह गरे ।

Advertisement

‘प्रधानमन्त्रीलाई मेरो आग्रह छ, तपाईं सचिवालयका सदस्यको मात्र भर नपर्नुहोस् । यहाँ थुप्रै संस्था छन्, यस विषयमा काम गरेका विज्ञ र अनुसन्धानकर्ता छन्,’ थापाले भने, ‘अमेरिकामै बसेर यसबारे अध्ययन गरेका व्यक्तिहरू पनि छन्, जसले राष्ट्रसंघलाई प्रभाव पार्न सक्छन् । उनीहरूसँग पनि छलफल गर्नुहोस् ।’ थापाले पर्याप्त तयारीका साथ महासभामा प्रस्तुत भए प्रधानमन्त्रीको भ्रमण फलदायी हुने बताए ।

उनले यसअघिका सरकार र प्रधानमन्त्रीहरूले अन्तर्राष्ट्रिय मञ्चमा उठाएका विषय तथा निर्वाह गरेको भूमिकाको समेत अध्ययन गर्न सुझाव दिए । सभापति थापाले हिमाली क्षेत्रले भोगिरहेको जलवायु जोखिमलाई अब राष्ट्रिय सुरक्षासँग समेत जोडेर हेर्नुपर्ने धारणा राखे ।