भोटेकोशी बाढीमा ज्यान गुमाउनेको संख्या चौध सयनजिक

काठमाडौं । भोटेकोशी बाढीमा परी ज्यान गुमाउनेको संख्या चौध सयनजिक पुगेको छ । राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार बाढीपछि हालसम्म एक हजार ३९९ जनाको शव फेला परिसकेको छ ।

प्राधिकरणले मंगलबार साँझ सार्वजनिक गरेको विवरणअनुसार सबैभन्दा धेरै शव चितवनमा फेला परेका छन् । चितवनमा ३६४, नवलपरासी पूर्वमा २३२, नवलपरासी पश्चिममा २२२, नुवाकोटमा २०२, रसुवामा १८९, गोरखामा ७८, धादिङमा ७२ र तनहुँमा ३८ जनाको शव फेला परेका हुन् । उपचारका क्रममा काठमाडौंमा थप दुई जनाको मृत्यु भएको प्राधिकरणले जनाएको छ ।

Advertisement

फेला परेका शवमध्ये हालसम्म १०४ जनाको मात्र सनाखत भएको छ । पहिचान हुन नसकेका शवको सनाखतका लागि डीएनए परीक्षणलगायतका प्रक्रिया अघि बढाइएको छ ।

बाढीपछि ठूलो संख्यामा मानिस अझै सम्पर्कविहीन छन् । प्राधिकरणका अनुसार हालसम्म पाँच हजार १७९ जना सम्पर्कविहीन रहेका छन् । उद्धार टोलीले प्रभावित क्षेत्रमा खोज तथा उद्धारको कामलाई निरन्तरता दिइरहेको छ । प्राधिकरणका प्रवक्ता शान्ति महतका अनुसार बाढी प्रभावित क्षेत्रबाट हालसम्म १३ हजार ७४२ जनाको उद्धार गरिएको छ ।

विपद्पछि प्रभावितको मानसिक तथा स्वास्थ्य अवस्थालाई ध्यानमा राख्दै स्वास्थ्य मन्त्रालयमार्फत १५० जना परामर्शदाता परिचालन गरिएको छ । यस्तै, नेपाल प्रहरीले सञ्चालन गरेका १६६ वटा सामुदायिक जनचेतना कार्यक्रममार्फत ४५ हजार २३८ जनालाई परामर्श दिइएको प्रवक्ता महतको भनाइ छ ।