एउटै सुरुङबाट निकालियो २४ शव

काठमाडौं । माथिल्लो त्रिशूली जलविद्युत् आयोजनाको अडिट–३ सुरुङबाट शनिबारसम्म २४ वटा शव निकालिएको छ। गत भदौ १० गते रसुवाको भोटेकोशीमा आएको बाढीका कारण सुरुङभित्र फसेकाहरूको खोजीका क्रममा ती शव फेला परेका हुन्।

खोजी तथा उद्धार टोलीले शनिबार पनि अडिट–३ सुरुङ क्षेत्रमा खोजी कार्यलाई निरन्तरता दिएको छ। सुरुङको अपस्ट्रिमतर्फ रहेको स्टिल ग्यान्ट्री फर्मवर्क हटाउने क्रममा करिब २०० किलो स्टिल सामग्री हटाएर खोजीका लागि आवश्यक ठाउँ तयार गरिएको छ।

Advertisement

नेपाली सेना, सशस्त्र प्रहरी र नेपाल प्रहरीको संयुक्त टोलीले स्टिल तथा रिबारभित्र फसेका सामग्री र भग्नावशेष हटाउँदै खोजी गरिरहेको छ। खोजी तथा उद्धारका लागि सुरक्षा निकाय र आयोजनाका गरी ४४ जना परिचालन भएका छन्।

डाउनस्ट्रिमतर्फ खोजीका लागि सर्च डगको टोलीसमेत परिचालन गर्ने तयारी गरिएको छ। मैलुङ क्याम्प क्षेत्रमा थप एउटा एक्स्काभेटर प्रयोग गरी भग्नावशेष हटाउने तथा सम्भावित स्थानमा खोजी गर्ने काम भइरहेको छ।

उपलब्ध मेसिन तथा जनशक्ति परिचालन गरेर सुरुङ क्षेत्रमा खोजी तथा उद्धार कार्य जारी राखिएको आयोजनाले जनाएको छ।