२०८३ आश्विन ४, आइतबार १९:०३
विराटनगर । सुनसरीको बर्जु गाउँपालिका–६ चिमडीमा हावाहुरीका कारण भाँचिएको रुखको हाँगाले लागेर आइतबार एक जना महिलाको मृत्यु भएको छ ।
बर्जु गाउँपालिका–६ चिमडीका हेमनारायण यादवकी श्रीमती ३८ वर्षीया सीता यादवको मृत्यु भएको सुनसरी प्रहरीका सूचना अधिकारी डीएसपी चन्द्रबहादुर खड्काले बताए । उनका अनुसार आइतबार दिउँसो करिब २ बजेतिर सीता बर्जु तालनजिकै गाईवस्तुका लागि घाँस काट्न गएकी थिइन् ।
सोही क्रममा अचानक आएको हावाहुरीले सिमलको रुखको हाँगा भाँचिएर उनलाई लागेको थियो । हाँगाले किचिएर गम्भीर घाइते भएकी उनलाई तत्काल उपचारका लागि विराटनगरको मोरङ सरकारी अस्पताल ल्याइएको थियो । त्यहाँबाट थप उपचारका लागि दिउँसो ४ः२८ बजेतिर मोरङको बूढीगंगास्थित विराट शिक्षण अस्पताल लगियो ।
विराट पुर्याएको केहीबेरमै सीतालाई चिकित्सकले मृत घोषणा गरिदिएको डीएसपी खड्काले बताए । इलाका प्रहरी कार्यालय दुहबीका इन्स्पेक्टर शिवराम थापा नेतृत्वको टोलीले घटनाको थप अनुसन्धान गरिरहेको छ ।
इमेल: [email protected]
ठेगाना: विराटनगर–२
मोबाइल नं. : ९८१९३३६४१६, ९८५२०५१७६५, ९८०७०१४०८१
कम्पनी रजिष्ट्रार दर्ता नं. : ३५०५५२–८१/८२
सूचना विभाग दर्ता नं. : ४६८३–२०८१/२०८२
सम्पादक : किशोर बुढाथोकी
×
