बाढीपहिरोले विभिन्न राजमार्ग अवरुद्ध

काठमाडौं। अविरल वर्षाका कारण आएको बाढी र पहिरोले देशका विभिन्न राजमार्ग पूर्ण वा आंशिक रूपमा अवरुद्ध भएका छन्। प्रहरीका अनुसार भदौ १० गते भोटेकोसी नदीमा आएको बाढीका कारण रसुवा, नुवाकोट र धादिङका सडक सञ्जालमा यातायात सञ्चालन गर्न समस्या भएको छ।

रसुवाका सबै मुख्य राजमार्ग अझै पनि पूर्ण रूपमा बन्द अवस्थामा रहेको प्रहरीले जनाएको छ। त्यस्तै, नुवाकोटको पासाङ ल्हामु सडक खण्ड पनि अर्को सूचना नभएसम्मका लागि पूर्ण रूपमा बन्द गरिएको छ।

Advertisement

धादिङको पृथ्वी राजमार्गअन्तर्गत बेनिघाट रोराङ गाउँपालिका-१० स्थित ज्वाङखोला र शितलबजार क्षेत्रमा भने सडक एकतर्फी मात्र सञ्चालनमा छ। यसैगरी बीपी राजमार्गको खुर्कोट-नेपालथोक सडक खण्डमा सवारी साधनको चापलाई मध्यनजर गर्दै प्रहरीले समय तालिका निर्धारण गरेको छ।

उक्त खण्डमा रातको समयमा मालबाहक र दिनको समयमा यात्रुवाहक सवारी साधन सञ्चालनका लागि पालो मिलाइएको प्रहरीले जानकारी दिएको छ।