महाकालीमा बेपत्ता सशस्त्र प्रहरीका असईको शव पाँच दिनपछि भेटियो

कञ्चनपुर । महाकाली नदीमा बेपत्ता भएका सशस्त्र प्रहरीका असई सागरराज थारुको शव पाँच दिनपछि फेला परेको छ । गत शनिबार दोधारा–चाँदनीस्थित झोलुङ्गे पुलसँगै चुँडिएको नेपाल टेलिकमको इन्टरनेट तार तान्ने क्रममा बोट अनियन्त्रित हुँदा थारु महाकाली नदीमा खसेर बेपत्ता भएका थिए ।

घटनापछि सशस्त्र प्रहरीको गोताखोर टोलीले लगातार खोजी गरिरहेको थियो । पाँचौँ दिनमा बेपत्ता भएको स्थानभन्दा करिब १० देखि १५ मिटर दक्षिणतर्फ शव फेला परेको जिल्ला प्रहरी कार्यालय कञ्चनपुरका प्रहरी नायब उपरीक्षक टेकबहादुर रावतले जानकारी दिए ।

उनका अनुसार शव अड्किएको अवस्थामा भेटिएको हो । शव परीक्षणपछि परिवारको जिम्मा लगाइने उनले बताए । बर्दियाको ठाकुरबाबा नगरपालिका–६ का थारु बेपत्ता हुनुभन्दा अघिल्लो दिन मात्रै दोधारा–चाँदनीस्थित सशस्त्र प्रहरीको सीमासुरक्षा गुल्ममा हाजिर भएका थिए ।

दुई साताअघि दोधारा–चाँदनी जोड्ने झोलुङ्गे पुल भत्किएको थियो । पुलसँगै नेपाल टेलिकमको इन्टरनेट तारसमेत चुँडिएको थियो ।