त्रियुगामा स्यालको आतंक : १५ पशुचौपाया घाइते, गाउँले त्रसित

विराटनगर । उदयपुरको त्रियुगा नगरपालिका–२ खैजनपुरमा जंगली स्यालले आतंक मच्चाएको छ । बुधबार साँझ गाउँ पसेको एउटा वयस्क स्यालले गाई, गोरु, भैँसी, राँगा, बाख्रा र खसी गरी कम्तीमा १५ वटा पशुचौपाया टोकेर घाइते बनाएपछि स्थानीय त्रसित बनेका छन् ।

वडाध्यक्ष घमानसिंह खत्री (ध्रुव)का अनुसार साँझ करिब ५ बजे गाउँ पसेको स्यालले मानिसदेखि नडराई बाटोमा भेटिएका तथा घरका गोठभित्र रहेका पशुचौपायालाई समेत आक्रमण गरेको थियो । दसैँको टीकाका दिन आफन्तकहाँ आउजाउ गर्नेको भीड रहे पनि स्यालको आक्रमणबाट मानिस भने जोगिएका छन् ।

करिब ३० किलोभन्दा बढी तौलको देखिने उक्त स्यालले छिमेकी टोल सनुवा र आसपासका क्षेत्रमा समेत पशुचौपायालाई टोकेको खबर आएको वडाध्यक्ष खत्रीले बताए । स्याल अस्वाभाविक रूपमा आक्रामक देखिएकाले स्थानीयले बहुलाएको आशंका गरेका छन् ।

घटनालगत्तै बिहीबार बिहानदेखि घाइते पशुचौपायालाई रेबिजविरुद्धको खोप लगाउन थालिएको छ । स्याल पुनः गाउँ पस्न सक्ने जोखिम रहेकाले वडाध्यक्ष खत्रीले नगरपालिका र प्रहरी प्रशासनसँग आवश्यक सतर्कता अपनाउन आग्रह गरेका छन् ।

भुल्के र चुरे जंगलसँग जोडिएको खैजनपुरमा यसअघि जंगली हात्तीको आवतजावतले स्थानीय त्रसित हुँदै आएका थिए । तर, स्यालले यसरी गाउँ पसेर पशुचौपायामाथि आक्रमण गरेको घटना आफूले पहिलोपटक देखेको स्थानीय काशी राईले बताए ।