नेपाल आउँदै भारतीय विदेश सचिव

काठमाडौं । भारतीय विदेश सचिव विक्रम मिस्री दुईदिने औपचारिक भ्रमणका लागि बुधबार नेपाल आउने भएका छन् । नोभेम्बर ४ र ५ (कात्तिक १८ र १९ गते)मा हुने उनको भ्रमणलाई नेपाल–भारतबीचको उच्चस्तरीय कूटनीतिक संवादका रूपमा हेरिएको छ ।

भ्रमणका क्रममा मिस्रीले नेपाली उच्च अधिकारीहरूसँग द्विपक्षीय सम्बन्ध, क्षेत्रीय परिस्थिति तथा अन्तर्राष्ट्रिय चासोका विषयमा छलफल गर्ने कार्यक्रम छ । भारतीय विदेश मन्त्रालयले भ्रमणको पुष्टि गर्दै यसले दुई देशबीच नियमित हुँदै आएको उच्चस्तरीय आदानप्रदानलाई निरन्तरता दिने जनाएको छ ।

नेपाल र भारतबीच विभिन्न क्षेत्रमा सहकार्य विस्तार भइरहेका बेला हुन लागेको यो भ्रमणलाई थप द्विपक्षीय समझदारी निर्माण गर्ने अवसरका रूपमा लिइएको छ । विशेषगरी विकास साझेदारी, आपसी हित र दुई देशबीचका साझा चासोका विषय छलफलमा आउन सक्नेछन् ।

यस भ्रमणलाई प्रधानमन्त्री बालेन्द्र शाह (बालेन)को सम्भावित भारत भ्रमणसँग पनि जोडेर हेरिएको छ । प्रधानमन्त्री शाह मंसिरको पहिलो साता भारत भ्रमणमा जाने तयारी भइरहेको बताइएको छ । यद्यपि, दुवै देशका सरकारले भ्रमणबारे औपचारिक घोषणा गरिसकेका छैनन् ।

परराष्ट्र मन्त्रालय र भारतीय विदेश मन्त्रालयले प्रधानमन्त्रीको भ्रमणको तयारी अघि बढाइरहेको स्रोतको भनाइ छ । विदेश सचिव मिस्रीले प्रधानमन्त्री शाहसँग गर्ने छलफल र त्यसबाट बन्ने समझदारीका आधारमा भारत भ्रमणको मिति तय हुने परराष्ट्र मन्त्रालयका एक अधिकारीले बताएका छन् ।

मिस्रीको नेपाल भ्रमणले प्रधानमन्त्री शाहको सम्भावित भारत भ्रमणको वातावरण तयार पार्ने र दुई देशबीचको आगामी उच्चस्तरीय संवादको दिशा तय गर्न सहयोग पुग्ने अपेक्षा गरिएको छ ।