चण्डेश्वरीका विद्यार्थीलाई निःशुल्क पोसाक, उत्कृष्टलाई नगद पुरस्कारको घोषणा

दिङ्ला । भोजपुरको षडानन्द नगरपालिका–८ स्थित चण्डेश्वरी आधारभूत विद्यालयमा अध्ययनरत २७ जना विद्यार्थीलाई निःशुल्क विद्यालय पोसाक वितरण गरिएको छ ।

विद्यालय व्यवस्थापन समिति र अभिभावकहरूको अनुरोधमा विद्यालयका जग्गादाता भीमबहादुर श्रेष्ठ र लोकबहादुर श्रेष्ठले करिब ३६ हजार रुपैयाँ बराबरको पोसाक सहयोग गरेका हुन् । श्रेष्ठ दाजुभाइले सहयोग गरेको पोसाक एक कार्यक्रमबीच विद्यार्थीलाई वितरण गरिएको हो ।

वितरण गरिएको पोसाक सेटमा विद्यालयको नाम, ठेगाना र लोगो अंकित टी–सर्ट, ट्रयाकसुट तथा ट्राउजर समावेश छन् । कार्यक्रममा पोसाकदाता भीमबहादुर श्रेष्ठ स्वयं उपस्थित भएर विद्यार्थीहरूलाई पोसाक हस्तान्तरण गरेका थिए । अर्का दाता लोकबहादुर श्रेष्ठ भने विशेष कारणवश कार्यक्रममा सहभागी हुन नसकेको जनाइएको छ ।

कार्यक्रममा विद्यालय व्यवस्थापन समितिका अध्यक्ष पीताम्बर श्रेष्ठ, पूर्ववडाध्यक्ष किशोर किराँत, अभिभावक, शिक्षक–शिक्षिका तथा स्थानीयको उल्लेख्य उपस्थिति रहेको थियो । कार्यक्रममा बोल्दै प्रधानाध्यापक आकांक्षा तामाङले दुर्गम क्षेत्रमा अझै धेरै अभिभावकले आफ्ना बालबालिकाका लागि विद्यालय पोसाक किन्ने अवस्था नरहेको बताइन् ।

एउटै पोसाक पाँचै दिन लगाएर विद्यालय आउनुपर्ने बाध्यता रहेका विद्यार्थीलाई नयाँ पोसाकले ठूलो राहत मिलेको उनको भनाइ थियो । प्रअ तामाङका अनुसार वितरण गरिएको नयाँ पोसाक विद्यार्थीले अब हप्तामा दुई दिन लगाउने छन् ।

त्यसै अवसरमा विद्यालय व्यवस्थापन समितिका अध्यक्ष पीताम्बर श्रेष्ठले चालु शैक्षिक सत्रदेखि कक्षा ४ र ५ को वार्षिक परीक्षामा प्रथम हुने विद्यार्थीलाई क्रमशः चार हजार र पाँच हजार रुपैयाँ नगद पुरस्कार प्रदान गरिने घोषणा गरेका छन् । स्वर्गीय पिता हर्कबहादुर श्रेष्ठ र माता नरमाया श्रेष्ठको स्मृतिमा आफ्नो कार्यकालभर उक्त पुरस्कार उपलब्ध गराइने जानकारी उनले दिए ।

अध्यक्ष श्रेष्ठले पोसाकदाता, अभिभावक तथा उपस्थित सबैलाई धन्यवाद ज्ञापन गर्दै कार्यक्रम समापन गरेका थिए । आफू व्यवस्थापन समितिको नेतृत्वमा आएपछि श्रेष्ठले विद्यालय सुधारका विभिन्न कार्यक्रम सञ्चालन गरिरहेका छन् ।