युगकवि सिद्धिचरण श्रेष्ठको ११५औँ जन्मजयन्ती मनाइँदै

काठमाडौं । नेपाली साहित्यका युगकवि सिद्धिचरण श्रेष्ठको ११५औँ जन्मजयन्ती आज (शनिरबा) देशभर विभिन्न साहित्यिक कार्यक्रम गरी मनाइँदैछ ।

विक्रम संवत १९६९ जेठ ९ गते ओखलढुंगा बजारमा जन्मिएका श्रेष्ठलाई नेपाली स्वच्छन्दतावादी काव्यधाराका अग्रणी व्यक्तित्वका रूपमा लिइन्छ । उनी बहुभाषी साहित्यकार थिए । उनले आफ्नो साहित्य सिर्जनालाई सामाजिक चेतना र भावनात्मक अभिव्यक्तिसँग जोडेर प्रस्तुत गरेका थिए ।

Advertisement

श्रेष्ठलाई नेपाली साहित्यमा ‘युगकवि’ र नेपाल भाषामा ‘कविरत्न’को उपाधि दिइएको छ । कविता, गीत, खण्डकाव्य, नाटक, निबन्ध तथा यात्रा संस्मरणलगायत विविध विधामा उनले उल्लेखनीय योगदान दिएका छन् । उनको ‘मेरो प्यारो ओखलढुंगा’, ‘जुनकिरी’, ‘निर्झर’, ‘भीमसेन थापा’जस्ता रचनाहरू विशेष चर्चित छन् ।

त्यस्तै, उनका कविता संग्रह ‘मेरो प्रतिबिम्ब’, ‘कोपिला’, ‘कुहिरो र घाम’ तथा खण्डकाव्य ‘उर्वशी’, ‘ज्यानमारा शैल’ र ‘आँसु’ साहित्यिक दृष्टिले महत्वपूर्ण कृति मानिन्छन् । साहित्यिक योगदानको कदरस्वरूप उनले भूकम्प तक्मा, त्रिभुवन पुरस्कार, रत्नश्री सुवर्ण पदक, पृथ्वी प्रज्ञा पुरस्कार, वेधनिधि पुरस्कारसहित गोरखा दक्षिण बाहु, त्रिशक्तिपट्ट लगायत विभिन्न सम्मान प्राप्त गरेका थिए ।

श्रेष्ठको २०४९ साल जेठ २२ गते निधन भएको थियो । युगकवि श्रेष्ठको जन्मजयन्तीका अवसरमा साहित्यिक संघसंस्था तथा पाठकहरूले विभिन्न कार्यक्रममार्फत श्रद्धाञ्जली अर्पण गरिरहेका छन् ।