एमाले सचिवालय बैठक बस्दै, नेतृत्व हस्तान्तरणको बहस तीव्र

काठमाडौं । नेकपा (एमाले)को केन्द्रीय सचिवालय बैठक आज (शनिबार) पनि बस्दैछ । पार्टीभित्र पछिल्लो राजनीतिक अवस्था, संगठनात्मक कमजोरी र नेतृत्वको भूमिकामाथि केन्द्रित बहस तीव्र बनेपछि बैठक दोस्रो दिनसम्म लम्बिएको हो ।

बैठक बिहान ११ः३० बजे भक्तपुरको गुण्डुस्थित अध्यक्ष केपी शर्मा ओलीको निवासमा बस्ने तय भएको छ । शुक्रबार सुरु भएको बैठकमा शीर्ष नेताहरूबीच लामो र खुला बहस भएको थियो । बैठकमा सहभागी नेताहरूका अनुसार पार्टीको वर्तमान अवस्था, जनतामाझ घट्दो प्रभाव, संगठनको निष्क्रियतालगायतका विषयमा गम्भीर समीक्षा गरिएको छ ।

Advertisement

शुक्रबारको बैठकमा अध्यक्ष ओलीलाई राजीनामाका लागि दबाबसमेत दिइएको छ । शुक्रबारको बैठकमा पाँच उपाध्यक्षहरूले धारणा राखेका थिए । उपाध्यक्षहरू पृथ्वीसुब्बा गुरुङ, विष्णु पौडेल, गोकर्ण बिष्ट र रघुजी पन्तले पार्टीलाई नयाँ ढंगले पुनर्गठन गर्नुपर्ने आवश्यकता औंल्याउँदै नेतृत्व हस्तान्तरणको विषय उठाएका थिए। उनीहरूले पार्टीलाई पुनः जनतामाझ स्थापित गर्न नयाँ पुस्ता र नयाँ कार्यशैली आवश्यक रहेको धारणा राखेको स्रोतले जनाएको छ । यद्यपि, उपाध्यक्ष रामबहादुर थापा ‘बादल’ले भने नेतृत्व परिवर्तनको मागमा साथ नदिएको बताइएको छ ।

बैठकमा नेताहरूले पछिल्लो समय पार्टीभित्र देखिएको गुटगत असन्तुष्टि, संगठन विस्तारमा आएको सुस्तता र सरकार सञ्चालनसँग जोडिएका आलोचनाबारे पनि धारणा राखेका थिए । केही नेताहरूले जनतासँग पार्टीको सम्बन्ध कमजोर बन्दै गएको भन्दै त्यसलाई सुधार गर्न ठोस योजना आवश्यक रहेको बताएका थिए ।

उपमहासचिव लेखराज भट्टका अनुसार बैठकमा पार्टीको अहिलेको अवस्थासम्मको समग्र समीक्षा भइरहेको छ । उनले अझै १२ जना नेताले धारणा राख्न बाँकी रहेको जानकारी दिए । उनका अनुसार छलफल लम्बिनुको कारण नेताहरूले खुलेर आफ्ना विचार राख्नु हो ।

बैठकमा नेताहरूको कार्य विभाजन, संगठन हेरफेर र जिम्मेवारी पुनःनिर्धारणको विषयले भने शुक्रबार प्रवेश पाउन सकेन । मुख्य रूपमा राजनीतिक समीक्षा र आगामी रणनीतिमै समय खर्चिएको नेताहरूले बताएका छन् । शनिबारको बैठकमा संगठनात्मक जिम्मेवारी बाँडफाँट र पार्टी सञ्चालनको विषयले पनि प्रवेश पाउने सम्भावना रहेको छ ।

एमालेभित्र पछिल्लो समय नेतृत्व पुस्तान्तरणको बहस क्रमशः चर्किँदै गएको छ । विशेषगरी दोस्रो तहका नेताहरूले पार्टीलाई आगामी चुनावमा प्रतिस्पर्धी बनाउन संगठन पुनर्संरचना र नेतृत्व शैलीमा परिवर्तन आवश्यक रहेको बताउँदै आएका छन् ।