प्याराग्लाइडिङको नयाँ गन्तव्य उदयपुरको बोप्ताङ डाँडा

विराटनगर । उदयपुरकाे बेलका नगरपालिका–८ मा रहेकाे बोप्ताङ डाँडा प्याराग्लाइडिङको नयाँ सिकाइ केन्द्रका रूपमा उदाएको छ । ‘फ्लाइङ अन्डर प्याराग्लाइडिङ स्कुल’ले व्यावसायिक प्रशिक्षण दिन थालेपछि साहसिक खेलप्रेमी पुग्न थालेका हुन् ।

सप्तकोशी नदी, हरियाली चुरे क्षेत्र र आसपासका पर्यटकीय स्थलको मनोरम दृश्य अवलोकन गर्दै उडान गर्न सकिने याे स्थानमा स्वदेशी मात्र नभई विदेशी प्रशिक्षार्थीसमेत आउने गरेका छन् ।

Advertisement

स्कुलका सञ्चालक एवं प्रशिक्षक सुरेन गुरुङका अनुसार स्थापनाको तीन वर्षमा १५० भन्दा बढीले तालिम लिइसकेका छन् । तालिम लिनेहरुमा भारत, चीन, स्पेन, फ्रान्स र जर्मनीका करिब ६० जना विदेशी नागरिक छन् ।

१५ दिने आधारभूत तालिमका लागि नेपाली प्रशिक्षार्थीलाई आवास र बीमासहित १ लाख ८० हजार रुपैयाँ शुल्क ताेकिएकाे छ । विदेशीलाई १५ सय अमेरिकी डलर शुल्क ताेकिएकाे छ ।

व्यावसायिक रूपमा पर्यटकलाई उडाउने ‘ट्यान्डम फ्लाइट’ सुरु गर्न भने सरकारी अनुमतिको आएकाे छैन ।
उदयपुरका चौदण्डीगढी, रौतापोखरी र उदयपुरगढी क्षेत्रमा गरिएका परीक्षण उडानहरू सफल भइसकेका छन् । हाल जिल्लामा २ महिलासहित १८ जना सोलो पाइलट सक्रिय छन् ।

नेपाल प्याराग्लाइडिङ तथा ह्याङ ग्लाइडिङ उदयपुरका अध्यक्ष ईश्वरमान राईले वन क्षेत्र व्यवस्थापन र सरकारी अनुमति प्रक्रिया सहज नहुँदा पूर्वाधार विकासमा अन्योल भएकाे बताए ।