‘खुट्टा भाँचिदिने’अभिव्यक्तिमा मन्त्री लम्साल : नियत खराब छैन

काठमाडौं । भौतिक पूर्वाधार तथा यातायात मन्त्री सुनिल लम्सालले ठेकेदारलाई ‘खुट्टा भाँचिदिने’ भन्दै दिएको धम्कीकाे विषयमा प्रतिनिधि सभामा स्पष्टीकरण दिएका छन् ।

बजेटमाथिको मन्त्रालयगत छलफलका क्रममा प्रतिपक्षी दल नेकपा एमालेका सांसद ऐन महरले सोधेको प्रश्नको जवाफ दिँदै मन्त्री लम्सालले आफ्नो उद्देश्य ठेकेदारलाई गाली गर्ने नभई काम गराउने मात्र रहेको दाबी गरे ।

Advertisement

केही दिनअघि पृथ्वी राजमार्गको मुग्लिन-मलेखु खण्ड अनुगमनका क्रममा बिजुलीको पोल नसारेको भन्दै मन्त्री लम्सालले निर्माण व्यवसायीको ‘खुट्टा भाँचिदिन’ भनेका थिए । त्यसअघि उनले ठेकेदार रमेश शर्मालाई प्रहरी लगाएर मन्त्रालयमा ल्याएका थिए ।

प्रतिनिधि सभा बैठकमा सांसद महरले मन्त्रीको यस्तो व्यवहारमाथि प्रश्न उठाउँदै सोधेका थिए, ‘ठेकेदारको खुट्टा भाँच्ने आदेश कानुन बमोजिम थियो कि थिएन ? दाहिने खुट्टा भाँच्ने हो कि देब्रे ? मन्त्रीको हैसियतमा यस्तो आदेश दिन मिल्छ ?’

सांसदको प्रश्नको सिधा जवाफ नदिई मन्त्री लम्सालले घुमाउरो पाराले आफ्नो बचाउ गरे । उनले ठेकेदारलाई थर्काउनुको पछाडि काम छिटो होस् भन्ने पवित्र उद्देश्य रहेको तर्क गरे । ‘ठेकेदार थर्काएको भन्ने कुरामा मेरो इन्टेन्सन (नियत) त्यो होइन । इन्टेन्सन नितान्त काम गरोस् भन्ने हो,’ मन्त्री लम्सालले भने, ‘काम भएन भने ठेक्का रद्द गर्नुपर्छ, बैंक ग्यारेन्टी जफत हुन्छ र सबै रकम असुल उपर गर्दा उनीलाई समेत गाह्रो पर्छ ।’

मन्त्री लम्सालले ठेक्का रद्द गर्दा देशमा काम गर्ने निर्माण कम्पनीहरूको संख्या घट्ने र त्यसले विकासमा बाधा पुग्ने बताए । उनले थपे, ‘५ करोडको प्रोजेक्ट रद्द भएर असुल उपर गर्दा उनीहरू उठ्नै नसक्ने गरी थला पर्न सक्छन् । त्यसैले बढीभन्दा बढी दबाब दिएर काम गराउन खोजेको हो । उनीहरूलाई (ठेकेदारलाई) बचाउनकै लागि दबाब दिएको हुँ ।’ मन्त्री लम्सालले काम नगर्ने ठेकेदारमाथि कठोर नभई काम फत्ते नहुने भन्दै आफ्नो व्यवहारको बचाउ पनि गरे ।