विराटनगरमा प्रहरीले पिछा गरेपछि पोखरीमा हाम फालेका किशोर मृत फेला

विराटनगर । विराटनगर महानगरपालिका–१८ भेडियारीमा प्रहरीले पिछा गरेको थाहा पाएपछि गाँजासहितको भारतीय नम्बर प्लेटको मोटरसाइकल छाडेर भाग्ने क्रममा पोखरीमा डुबेर बेपत्ता भएका एक जना किशोर शुक्रबार बिहान मृत फेला परेका छन् ।

मोरङ प्रहरीका डीएसपी सन्तोष श्रेष्ठका अनुसार विराटनगर महानगरपालिका–१८ का १७ वर्षीय मञ्जितकुमार यादवलाई भेडियारी पोखरीको बीच भागमा मृत फेला पारिएको हो । शुक्रबार बिहान १०ः३० बजेतिर पोखरीको बीच भागमा तैरिरहेको अवस्थामा उनको शव देखिएको प्रहरीले जनाएको छ । यद्यपि, शव बाहिर निकालिएको छैन ।

बोट (डुंगा)को प्रयोग गरेर शव बाहिर निकाल्ने तयारी गरिएको प्रहरीले जनाएको छ । यादव बुधबार बिहान ८ः५० बजेतिर पोखरीमा डुबेर बेपत्ता भएका थिए । अस्थायी प्रहरी पोस्ट भेडियारीको टोलीले दुई जना सवार रहेको बीआर ५० एएल ३६८७ नम्बरको मोटरसाइकललाई रोक्न खोज्दा चालक मोटरसाइकल छाडेर फरार भएका थिए ।

प्रहरीले पिछा गरेको थाहा पाएपछि फरार हुने क्रममा पोखरीमा यादव डुबेर बेपत्ता भएको प्रहरीले जनाएको छ । घटना भएयता स्थानीय, नेपाल र सशस्त्र प्रहरीले उनको खोजी गरिरहेका थिए । यादवको खोजीका लागि सशस्त्र प्रहरीको गोताखोर टोलीसमेत परिचालन गरिएको थियो । तर, शव आफैं पानीमाथि तैरिरहेको अवस्थामा फेला परेको प्रहरीले जनाएको छ ।

पोखरीमा डुबेको दुई दिनपछि मृत फेला परेका यादवलाई करिब १ वर्षअघि पनि प्रहरीले गाँजासहित पक्राउ गरेको थियो । तर, मुद्दा चलाउनलाई उमेर कम देखिएपछि आगामी दिनमा लागुऔषधको धन्दामा संलग्न नहुने सर्तमा प्रहरीले कारबाही नगरिकन अभिभावकको जिम्मा लगायो ।

मुद्दा नचलाइकन प्रहरीले छाडेको एकपछि गाँजाको धन्दासँगै जोडिएर यादवको ज्यान गएको छ । प्रहरीका अनुसार यादवले चलाएको मोटरसाइकलमा दुई जना सवार थिए । उनी भाग्ने क्रममा पोखरीमा हाम फालेर बेपत्ता भएको र अर्का एक जनालाई गाँजासहित पक्राउ गरिएको प्रहरीले जनाएको छ ।

गाँजा र मोटरसाइकलसहित पक्राउ पर्नेमा भारतको सुपौल जिल्ला गनौरा पञ्चायत–५ का ४१ वर्षीय शिवधर यादव हुन् । मोटरसाइकलको पछाडि बसेका यादवले बोकेको झोला चेकजाँच गर्दा लुकाइछिपाइ राखिएको ६ किलो १३० ग्राम गाँजा बरामद भएको डीएसपी श्रेष्ठले बताए । उनका अनुसार गाँजासहित पक्राउ परेका भारतीय नागरिक यादवमाथि भने प्रहरीले अनुसन्धान गरिरहेको छ ।

विराटनगरमा गाँजासहितको मोटरसाइकल छाडेर भागेका चालक पोखरीमा डुबेर बेपत्ता