गृहमन्त्रीले छाडे विराटनगर, सिरहा प्रस्थान

विराटनगर । सुनसरीको देवानगन्ज गोलीकाण्डका मृतक परिवारसँग सहमति गरेर गृहमन्त्री सुधन गुरुङ शुक्रबार सिरहातर्फ प्रस्थान गरेका छन् ।

देवानगन्ज घटनामा ज्यान गुमाएका ओमप्रकाश मेहता र जयप्रकाश मेहताका परिवारसँग बिहीबार राति सहमति गरेपछि गृहमन्त्री गुरुङले शुक्रबार दिउँसो विराटनगर छाडेका हुन् । रातभर छलफल र सहमति प्रक्रियामा व्यस्त रहेका उनी शुक्रबार बिहान करिब ६ः३० बजेतिर कोशी प्रदेश प्रहरी कार्यालयमा फर्किएका थिए ।

Advertisement

प्रदेश प्रहरी कार्यालयको गेस्ट हाउसमा आराम गरेर उनी सिरहातर्फ लागेका हुन् । देवानगन्ज घटनामा मृतकका परिवार सहमतिपछि शव बुझ्न तयार भए पनि अहिलेसम्म शव उठ्न सकेको छैन ।

सिरहामा भएको घटनामा मृत्यु भएका व्यक्तिका परिवारले पनि गृहमन्त्रीसँग प्रत्यक्ष छलफल र सहमति हुनुपर्ने अडान लिएका छन् । गृहमन्त्री गुरुङले सिरहा पुगेर मृतकका परिवारसँग भेटघाट गर्ने कार्यक्रम रहेको प्रहरीले जनाएको छ ।

देवानगन्ज गोलीकाण्ड र त्यसपछि उत्पन्न परिस्थितिलाई समाधान गर्ने प्रयासस्वरूप गृहमन्त्रीले सिरहा पुगेर त्यहाँका पीडित परिवारसँग पनि वार्ता गर्ने तयारी गरेका छन् ।