धवलशमशेरसँग कुरा नमिलेपछि छुट्टै पार्टी खोल्ने प्रसाईँको तयारी

काठमाडौं । नेता धवलशमशेर राणा र मेडिकल व्यवसायी दुर्गा प्रसाईँबीचको सहकार्य टुङ्गिएको छ। एउटै दल बनाएर अघि बढ्ने छलफल परिणाममुखी हुन नसकेपछि दुवै जना अलग-अलग पार्टी गठनको तयारीमा लागेका हुन्।

राणाले शुक्रबार निर्वाचन आयोगमा ‘जय नेपाल’ नामक नयाँ राजनीतिक दल दर्ता गराउने भएका छन्। राणा आयोग धाउँदा यता प्रसाईँले पनि आफ्नै नेतृत्वमा छिट्टै नयाँ पार्टी घोषणा गर्ने तयारी थालेका छन्। प्रसाईँले शुक्रबार सामाजिक सञ्जालमार्फत आफ्ना समर्थक तथा शुभेच्छुकलाई केही समय धैर्य गर्न आग्रह गरे।

Advertisement

अब बन्ने पार्टी सबै नेपाली नागरिक, जातजाति र धर्मको साझा चौतारी हुने प्रसाईँको दाबी छ। वैदिक सनातनी हिन्दु अधिराज्यको एजेन्डासहित देशका पीडित, शोषित र आम नागरिकको हक, अधिकार अनि न्यायका लागि समर्पित भएर आफ्नो दल मैदानमा उत्रिने उनले बताए।

२००४ देखि यता धेरै पार्टी बने पनि गरिब, भुइँमान्छे, सुकुम्बासीका साथै लघुवित्त, सहकारी र मिटरब्याजीको मारमा परेका नागरिकको अवस्था नफेरिएको प्रसाईँले उल्लेख गरे। पुराना कुनै पनि दल सर्वसाधारणका वास्तविक प्रतिनिधि बन्न नसकेकाले नै आफूहरूले राजालाई साक्षी राखेर नागरिकका मुद्दा बोक्दै नयाँ यात्रा थालेको उनको भनाइ छ।