पूर्वाञ्चल विश्वविद्यालयलाई प्रविधिमैत्री र नतिजामुखी बनाउन शिक्षामन्त्रीको निर्देशन

विराटनगर । शिक्षा तथा खेलकुद मन्त्री एवम् पूर्वाञ्चल विश्वविद्यालयका सहकुलपति सस्मित पोखरेलले विश्वविद्यालयलाई प्रविधिमैत्री र नतिजामुखी बनाउन निर्देशन दिएका छन् । विश्वविद्यालयको केन्द्रीय कार्यालय, गोठगाउँमा आज (सोमबार) आयोजित समसामयिक विषयक छलफल तथा परिचयात्मक कार्यक्रमलाई सम्बोधन गर्दै उनले डिजिटलीकरणको कार्यलाई युद्धस्तरमा अघि बढाउन र नयाँ नेतृत्वलाई परिणाममुखी काममा केन्द्रित हुन आग्रह गरे ।

विश्वविद्यालयको समग्र सुधारका लागि सबै पक्षबीच समन्वय र सहकार्य आवश्यक रहेको उल्लेख गर्दै मन्त्री पोखरेलले शैक्षिक गुणस्तर, प्रशासनिक दक्षता र सेवा प्रवाहमा सुधार ल्याउँदै विश्वविद्यालयलाई समयानुकूल र प्रतिस्पर्धी बनाउन सबैले जिम्मेवारीपूर्वक काम गर्नुपर्नेमा जोड दिए ।

Advertisement

उपकुलपति प्रा. डा. सुजन बाबु मरहट्टाको अध्यक्षतामा भएको कार्यक्रममा उनले विश्वविद्यालयलाई आधुनिक संस्थाका रूपमा विकास गर्न डिजिटलीकरण तथा विद्युतीय सुशासनलाई उच्च प्राथमिकता दिइने बताए। प्रशासनिक तथा शैक्षिक गतिविधिलाई पारदर्शी र सेवाग्राहीमैत्री बनाउन सुधारका कामलाई तीव्रता दिने प्रतिबद्धता जनाउँदै उपकुलपति मरहट्टाले हाल प्रयोग भइरहेको जग्गा विश्वविद्यालयको नाममा कायम गराउन सरकारी पहलका लागि सहकुलपतिसमक्ष अनुरोध गरे ।

कार्यक्रममा रजिस्ट्रार प्रा.डा. पन्ना थापाले उपकुलपतिद्वारा प्रस्तुत पाँचवर्षे रणनीतिक योजनाका आधारमा शैक्षिक, प्रशासनिक तथा व्यवस्थापकीय गतिविधिलाई थप चुस्त र प्रभावकारी रूपमा अघि बढाउने जानकारी दिए । त्यसैगरी, शिक्षामन्त्रीका सल्लाहकार शैलेन्द्र झाले विश्वविद्यालयका चुनौती सम्बोधन गर्न परम्परागत शैली छाडेर आमूल परिवर्तनकारी नीति लिनुपर्ने र आगामी कामहरू स्पष्ट एवम् मापनयोग्य नतिजा देखिने गरी गर्नुपर्ने बताए ।

खुला अन्तरक्रिया सत्रमा विद्यार्थी प्रतिनिधि रजत दासले पठनपाठनका क्रममा विद्यार्थीहरूले भोग्नुपरेका व्यावहारिक समस्या र शैक्षिक सुधारका विषयमा ध्यानाकर्षण गराए । स्थानीय नागरिक समाजका अगुवा चिरञ्जीवी शिवाकोटीले विश्वविद्यालयद्वारा सञ्चालित अस्पताललाई सर्वसाधारणले प्रत्यक्ष अनुभूति गर्ने गरी सेवामुखी बनाउन सरकार र विश्वविद्यालय प्रशासनको ध्यानाकर्षण गराए ।

कार्यक्रममा मन्त्रालयका प्रतिनिधि, विश्वविद्यालयका पदाधिकारी, शिक्षक, कर्मचारी, नागरिक समाज र विद्यार्थी प्रतिनिधिहरूको उपस्थिति थियो ।