शवको संख्या १,४०९ पुग्यो

काठमाडौं । भोटेकोशी नदीमा आएको विनाशकारी बाढीपछि बेपत्ताको खोजी र शव व्यवस्थापनको काम जारी रहे पनि मानवीय क्षतिको संख्या ठूलो देखिएको छ । हालसम्म शवको संख्या १ हजार ४०९ पुगेको छ । बिहीबार बिहान ५ बजेसम्म बाढी प्रभावित विभिन्न जिल्लाबाट १ हजार ४०९ जनाको शव फेला परेको हो ।

नेपाल प्रहरीका अनुसार रसुवामा १९९, नुवाकोटमा २०२, धादिङमा ७२, चितवनमा ३६४, गोरखामा ७८, तनहुँमा ३८, नवलपरासी पूर्वमा २३२ र नवलपरासी पश्चिममा २२२ जनाको शव फेला परेको छ । यस्तै, काठमाडौंमा उपचारका क्रममा थप दुई जनाको मृत्यु भएको प्रहरीले जनाएको छ ।

Advertisement

फेला परेका शवको पहिचानका लागि डीएनए नमुना संकलन तथा अन्य आवश्यक प्रक्रिया अघि बढाइएको छ । हालसम्म १ हजार २३७ शव व्यवस्थापन गरिएको छ । पहिचानको प्रक्रिया पूरा नभएका शवलाई सुरक्षित रूपमा माटोमुनि राखिएको प्रहरीले जनाएको छ ।

शव पहिचानका लागि मृतकका १ हजार २८६ र आफन्तका १ हजार ९१४ गरी कुल ३ हजार २०० वटा डीएनए नमुना संकलन गरिएको छ । पहिचान हुन बाँकी १ हजार ३६१ शवको विवरण नेपाल प्रहरीको वेबसाइटमा सार्वजनिक गरिएको छ ।

बाढी प्रभावित क्षेत्रमा उद्धार, खोजी, राहत वितरण तथा शव व्यवस्थापनका लागि ७ हजार ९७५ प्रहरी कर्मचारी परिचालन गरिएको छ । बाढीपछि अझै ४ हजार ८९ जना बेपत्ता रहेको र उनीहरूको खोजी कार्य जारी रहेको प्रहरीले जनाएको छ ।

यसैबीच, विभिन्न जिल्लामा स्थापना गरिएका होल्डिङ सेन्टरमा १ हजार ९७९ जनालाई राखिएको छ । बेपत्ताको खोजी, उद्धार तथा राहतको कामसँगै शव पहिचान र व्यवस्थापनलाई पनि तीव्रता दिइएको प्रहरीले जनाएको छ ।