विराटनगरमा मोटरसाइकल ठोक्किँदा प्रहरीसहित २ जना घाइते

विराटनगर । विराटनगरमा बिहीबार राति दुई मोटरसाइकल एकआपसमा ठोक्किँदा प्रहरी जवानसहित दुई जना घाइते भएका छन् ।

प्रहरीका अनुसार विराटनगर महानगरपालिका–७ स्थित शनिमन्दिर अगाडि कोशी राजमार्गमा दुई मोटरसाइकल ठोक्किएर दुर्घटना भएको हो ।

बरगाछीबाट रोडशेषतर्फ जाँदै गरेको प्रदेश १–०२–०४८ प ६८४४ नम्बरको मोटरसाइकल र जलजला चोकबाट शनिमन्दिरतर्फ सडक पार गर्दै गरेको प्रदेश १–०२–०५६ प ५७१९ नम्बरको मोटरसाइकल बिहीबार राति ठोक्किएका थिए ।

दुर्घटनामा सुनसरीको बर्जु गाउँपालिका–५ का २१ वर्षीय सुजित नारायण मेहता घाइते भएका छन् । उनको घाँटी र खुट्टामा चोट लागेको छ । पारस अस्पतालमा सामान्य उपचारपछि थप उपचारका लागि उनलाई विराट नर्सिङ होम पठाइएको छ। उनको अवस्था मध्यम छ ।

त्यस्तै, अर्को मोटरसाइकलका चालक २५ वर्षीय प्रहरी जवान युगल मगर पनि घाइते भएका छन् । भोजपुरको आमचोक गाउँपालिका–८ घर भएका मगर कोशी प्रदेश प्रहरी तालिम केन्द्र, रानी विराटनगरमा कार्यरत छन् । उनको खुट्टामा चोट लागेको छ। कोशी अस्पतालमा उपचाररत उनको अवस्था सामान्य रहेको प्रहरीले जनाएको छ ।