राष्ट्रपति भवन परिसरमा मिसाइल आक्रमण, ५ जनाको मृत्यु

एजेन्सी । यमनको अन्तरिम राजधानी अदनस्थित राष्ट्रपति भवन परिसरमा हुथी विद्रोहीले मिसाइल आक्रमण गर्दा कम्तीमा पाँच जनाको मृत्यु भएको छ भने १६ जना घाइते भएका छन् ।

अलजजिराका अनुसार मृत्यु हुनेमा प्रधानमन्त्रीका दुई सुरक्षागार्ड पनि छन् । यमनका स्वास्थ्य मन्त्रीले घटनामा पाँच जनाको मृत्यु भएको र १६ जना घाइते भएको जानकारी दिएका हुन् । अन्य मृतकको पहिचान खुल्न सकेको छैन ।

रोयटर्सका अनुसार आक्रमणका बेला प्रधानमन्त्री र केही मन्त्री राष्ट्रपति भवन परिसरमा थिए। यद्यपि, सरकारका उच्च अधिकारीहरू सकुशल रहेको बताइएको छ ।

प्रत्यक्षदर्शीका अनुसार राष्ट्रपति भवन परिसर आसपास कम्तीमा पाँचवटा शक्तिशाली विस्फोटका आवाज सुनिएका थिए । आक्रमणपछि परिसरमाथि धुवाँको ठूलो मुस्लो देखिएको थियो । प्रारम्भिक विवरणअनुसार परिसरमा कम्तीमा पाँचवटा मिसाइल प्रहार भएका थिए ।

हुथी विद्रोहीले आक्रमणको जिम्मेवारी लिँदै अदनमा रहेको साउदी अरबको सैन्य अभियान मुख्यालयलाई निशाना बनाएको दाबी गरेका छन् ।

हुथी सैन्य प्रवक्ता याह्या सरीले साउदी अरबको सैन्य उपस्थितिलाई लक्षित गर्ने आफ्नो नीतिअनुसार आक्रमण गरिएको बताएका छन् । उनका अनुसार साउदी सेनाको सैन्य गतिविधि र जमघट हुने स्थानलाई निशाना बनाइनेछ ।