सुनसरीमा खसी-बोकाको मासुको मूल्य तोकियो

इनरुवा । सुनसरीमा खसी तथा बोकाको मासुको उपभोक्ता खुद्रा मूल्य प्रतिकेजी अधिकतम १ हजार १ सय रुपैयाँ तोकिएको छ ।

जिल्ला प्रशासन कार्यालय सुनसरीले सूचना जारी गर्दै मासुको खुद्रा मूल्य अचानक बढेको भन्दै उपभोक्ताहरूबाट उजुरी तथा गुनासो प्राप्त भएकाले यस्तो निर्णय गरिएको जनाएको छ ।

मूल्य वृद्धि गर्नुपर्ने तत्काल कुनै मनासिव आधार नरहेको र गत माघ महिनामा समेत प्रतिकेजी १ हजार १ सय रुपैयाँ मूल्य कायम भएको प्रशासनले स्पष्ट पारेको छ ।

केही मासु विक्रेताहरूले प्रतिकेजी १ हजार १ सय रुपैयाँमै बिक्री गर्ने प्रतिबद्धता व्यक्त गरेकाले अर्को व्यवस्था नभएसम्मका लागि जिल्लाभर सोही मूल्यमा खसी तथा बोकाको मासु खरिद बिक्री गर्न आग्रह गरिएको छ ।

सूचनालाई बेवास्ता गरी कसैले अनुचित र अस्वाभाविक मूल्य लिई मासु बिक्री गरेको पाइएमा कानुन बमोजिम कारबाही गरिने चेतावनी समेत जिल्ला प्रशासन कार्यालयले दिएको छ ।