दसैँमा पनि खुला रहनेछन् आयल निगमका डिपो, इन्धन अभाव हुन नदिने

काठमाडौं । नेपाल आयल निगमले दसैँको सार्वजनिक बिदामा पनि पेट्रोलियम पदार्थको सहज आपूर्ति सुनिश्चित गर्न आफ्ना डिपो तथा कार्यालयहरू खुला राख्ने भएको छ ।

निगमले शुक्रबार प्रेस विज्ञप्ति जारी गर्दै दसैँको बिदामा उपभोक्तालाई इन्धनको अभाव हुन नदिन स्थानीय आवश्यकताअनुसार प्रादेशिक तथा शाखा कार्यालय र डिपोहरू सञ्चालन गर्ने तालिका सार्वजनिक गरेको हो ।

निगमले बिदाको समयमा इन्धन आपूर्ति तथा उपलब्धतामा समस्या देखिए तत्काल समाधानका लागि केन्द्रीय कार्यालयका अधिकारीहरूलाई सम्पर्क गर्नसमेत अनुरोध गरेको छ ।

विज्ञप्तिअनुसार पेट्रोल तथा डिजेलको आपूर्तिसम्बन्धी समस्या भए नवराज पोखरेललाई ९८४१४८०२०७ मा सम्पर्क गर्न सकिनेछ । त्यस्तै, एलपी ग्यास तथा हवाई इन्धनसम्बन्धी समस्या भए सञ्जीव सङ्ग्रौलालाई ९८४१४३३६०४ मा सम्पर्क गर्न निगमले जनाएको छ ।

दसैँका बेला इन्धनको माग बढ्न सक्ने अवस्थालाई ध्यानमा राख्दै निगमले बिदाको समयमा पनि आपूर्ति व्यवस्थापनलाई निरन्तरता दिने जनाएको छ ।