इजरायली चुनावमा सत्ताको समीकरण अनिश्चित, नेतान्याहु र आइसेनकोटको समूह बराबरीको अवस्थामा

काठमाडौं । इजरायलको निर्वाचनमा प्रधानमन्त्री बेन्जामिन नेतान्याहु र उनका प्रतिस्पर्धी आइसेनकोट नेतृत्वको समूहबीच कडा प्रतिस्पर्धा देखिएको छ । मतदानपछिका सर्वेक्षणले दुवै पक्षको शक्ति लगभग बराबरीमा देखाएपछि नयाँ सरकार गठनको समीकरण अनिश्चित बनेको छ ।

मंगलबार सार्वजनिक विभिन्न सञ्चारमाध्यमका एक्जिट पोलअनुसार नेतान्याहु र आइसेनकोट नेतृत्वका समूहबीच संसद्मा बहुमत पुर्‍याउने प्रतिस्पर्धा रोचक बनेको छ । ‘कान ११’ र ‘च्यानल १३’ का सर्वेक्षणले दुवै समूहले समान ५१–५१ सिट जित्ने अनुमान गरेका छन् । ‘च्यानल १२’ को पछिल्लो सर्वेक्षणमा भने नेतान्याहुको समूह ५२ सिटसहित अगाडि देखिएको छ भने आइसेनकोट नेतृत्वको समूहले ५० सिट प्राप्त गर्ने अनुमान गरिएको छ ।

इजरायलको संसद् नेसेटमा सरकार गठनका लागि कम्तीमा ६१ सिट आवश्यक पर्छ । तर, एक्जिट पोलका कुनै पनि अनुमानले प्रतिस्पर्धी समूहलाई स्पष्ट बहुमत दिएको छैन । त्यसैले अन्तिम नतिजा र सम्भावित गठबन्धनले सरकार गठनको दिशा तय गर्ने देखिएको छ ।

निर्वाचनमा मतदाताको उत्साह पनि उल्लेखनीय देखिएको छ । केन्द्रीय निर्वाचन समितिका अनुसार मतदान प्रतिशत ७७.७ पुगेको छ । यो सन् १९९९ यताकै उच्च मतदान हो । कुल करिब ७३ लाख योग्य मतदातामध्ये झन्डै ५७ लाखले मतदान गरेका छन् ।

स्थानीय समयअनुसार राति १० बजे मतदान केन्द्र बन्द भए पनि सैनिक, रिजर्भ सैनिक, कूटनीतिज्ञलगायतले प्रयोग गर्ने दोहोरो खाम प्रणालीका मतपत्र गणना हुन बाँकी छन् । ती मतपत्रको गणना तत्काल सुरु नहुने निर्वाचन समितिले जनाएको छ । बाँकी मतपत्रको गणनापछि मतदानको अन्तिम प्रतिशतमा परिवर्तन हुन सक्छ ।

इजरायलमा यसअघि सन् १९८८ मा ७९.७ प्रतिशत मतदान भएको थियो । जुन अहिलेसम्मकै उच्च दर हो ।

यसैबीच, केन्द्रीय निर्वाचन समितिले आधिकारिक मतगणना सुरु गरेको छ । सार्वजनिक विवरणअनुसार प्रारम्भिक चरणमा कुल मतको २.५ प्रतिशत गणना भएको छ । प्रारम्भिक मतगणना र एक्जिट पोलका अनुमान फरक पर्न सक्ने भएकाले अन्तिम परिणाम आउन बाँकी छ ।

बहुमतका लागि आवश्यक ६१ सिट कुनै पनि समूहले प्राप्त गर्न नसकेमा सरकार गठनका लागि अन्य दलको समर्थन निर्णायक बन्न सक्छ । त्यसैले निर्वाचनको अन्तिम नतिजाले मात्रै इजरायलको आगामी राजनीतिक नेतृत्वको स्पष्ट तस्बिर दिनेछ ।