स्वास्थ्य जटिल बनेपछि डा. केसीलाई काठमाडौं लैजाने तयारी

इलाम । चिकित्सा शिक्षा र स्वास्थ्य क्षेत्र सुधारको माग राख्दै इलाममा २५औँ सत्याग्रहमा रहेका प्रा. डा. गोविन्द केसीको स्वास्थ्य अवस्था जटिल बनेपछि थप उपचारका लागि काठमाडौं लैजाने तयारी गरिएको छ । नेपाली सेनाको हेलिकप्टरमार्फत उनलाई काठमाडौं लैजान लागिएको हो । त्यसका लागि सेनाको हेलिकप्टर इलाम आउँदै गरेको स्थानीय प्रशासनले जनाएको छ ।

इलाम अस्पतालमा उपचाररत डा. केसीको स्वास्थ्य अवस्था बिग्रँदै गएपछि चिकित्सकले थप उपचारको आवश्यकता औँल्याएका हुन् । उपचारमा संलग्न चिकित्सकका अनुसार उनको रगतमा ग्लुकोजको मात्रा निकै कम भएको र मुटुको चालमा समेत गडबडी देखिएको छ । रगतमा ग्लुकोजको मात्रा घटेर ३५ मिलिग्राम प्रतिडेसिलिटरमा झरेको अस्पतालले जनाएको छ । पिसाबमा एसिटोनको मात्रा बढ्नुका साथै रक्तचाप पनि १००–६० रहेको चिकित्सकले बताएका छन् ।

चिकित्सकले उनको स्वास्थ्यमा थप जोखिम आउन नदिन ग्लुकोज दिन आग्रह गरे पनि डा. केसीले अस्वीकार गर्दै आएका छन् । शरीरमा पानी चढाइरहेको भए पनि ग्लुकोजको मात्रा अत्यधिक कम हुँदा थप स्वास्थ्य जटिलता उत्पन्न हुन सक्ने उपचारमा संलग्न चिकित्सकको भनाइ छ ।

डा. केसीको स्वास्थ्य अवस्थालाई ध्यानमा राख्दै इलाम अस्पतालले तत्काल प्रतिकार्य टोली समेत गठन गरेको छ । अस्पतालको पत्रअनुसार मेडिकल सुपरिटेन्डेन्टको संयोजकत्वमा कन्सल्टेन्ट फिजिसियन, एनेस्थेसियोलोजिस्ट र मेडिकल अधिकृत सम्मिलित चार सदस्यीय टोली बनाइएको हो ।

टोलीले डा. केसीको स्वास्थ्य अवस्थाको नियमित निगरानी, आवश्यकताअनुसार तत्काल स्वास्थ्य सेवा तथा आकस्मिक उपचारको व्यवस्था मिलाउनेछ । अस्पतालले उनको स्वास्थ्य अवस्थाबारे नियमित अनुगमन र मूल्याङ्कन गर्दै आवश्यक उपचार उपलब्ध गराउने जनाएको छ ।

चिकित्सा शिक्षा र स्वास्थ्य सेवामा सुधारको माग राख्दै डा. केसीले गत कात्तिक १२ गते साँझदेखि इलामको नारायणस्थानमा २५औँ सत्याग्रह सुरु गरेका थिए । सत्याग्रहको तेस्रो दिन स्वास्थ्य अवस्था कमजोर बनेपछि उनलाई शनिबार राति एम्बुलेन्समार्फत इलाम अस्पताल पुर्‍याइएको थियो ।

डा. केसीले कैलालीस्थित सहिद दशरथ चन्द स्वास्थ्य विज्ञान विश्वविद्यालयमा आवश्यक पूर्वाधार र जनशक्ति नपुगी चिकित्सा शिक्षा कार्यक्रम सञ्चालन गर्न सिट निर्धारण गरिएको भन्दै त्यसको निर्णय खारेज गर्न माग गरेका छन् । चिकित्सा शिक्षा ऐन र निर्धारित मापदण्डविपरीत मेडिकल कलेजमा बढाइएका सिट खारेज गर्नुपर्ने उनको अर्को माग छ ।

त्यस्तै, चिकित्सा शिक्षा आयोगका उपाध्यक्ष तथा गेटा विश्वविद्यालयका उपकुलपति र रजिस्ट्रारलाई निलम्बन गरी नियुक्ति र निर्णय प्रक्रियाबारे निष्पक्ष छानबिन गर्नुपर्ने, गेटा अस्पताल पूर्ण क्षमतामा सञ्चालन गर्नुपर्ने र चिकित्सा शिक्षामा ७५ प्रतिशत छात्रवृत्तिको व्यवस्था कायम राख्नुपर्ने माग उनले अघि सारेका छन् ।

सरकारसँग गत साउन ११ गते भएका सहमति कार्यान्वयन गर्नुपर्ने तथा इलाम, उदयपुर र डडेलधुरामा सरकारी मेडिकल कलेज वा स्वास्थ्य विज्ञान प्रतिष्ठान स्थापना गर्ने पुराना सहमति पूरा गर्नुपर्ने पनि उनका माग छन् ।