टीका, माला र आशीर्वादसँगै यस वर्षको तिहार सम्पन्न (फोटोफिचर)

काठमाडौं ।। नेपालीको दोस्रो ठूलो पर्व तिहार हर्षोल्लास, उमङ्ग र आपसी सद्भावका साथ सम्पन्न भएको छ । यमपञ्चकको सुरुआतसँगै पाँच दिनसम्म मनाइएको तिहार भाइटीकासँगै सम्पन्न भएको हो ।

तिहारको अन्तिम दिन आज दिदीबहिनीले दाजुभाइको निधारमा सप्तरङ्गी टीका लगाइदिँदै मखमली तथा सयपत्री फूलको माला पहिर्‍याएर दीर्घायु, सुख, शान्ति र समृद्धिको कामना गरेका छन् । दाजुभाइले पनि दिदीबहिनीलाई उपहार तथा दक्षिणा प्रदान गर्दै उनीहरूको सुखी जीवनको कामना गरेका छन् ।

भाइटीकाका अवसरमा बिहानैदेखि घरघरमा टीका लगाउने र आशीर्वाद लिने क्रम चलेको थियो । टाढा रहेका आफन्त तथा दाजुभाइ दिदीबहिनीकहाँ पुगेर टीका लगाउन व्यस्त देखिन्थे भने कतिपयले घरमै आफन्त तथा परिवारजनलाई बोलाएर भाइटीका मनाएका थिए ।

तिहारका पाँच दिन काग तिहार, कुकुर तिहार, लक्ष्मी पूजा, गोवर्द्धन पूजा तथा म्हः पूजा र भाइटीका गरी विभिन्न धार्मिक तथा सांस्कृतिक परम्परा निर्वाह गरियो ।

लक्ष्मी पूजाका दिन घरआँगन सफा गरी दीप प्रज्वलन र झिलिमिली बत्तीले सजाइएको थियो । देउसी–भैलो, फूलमाला र विभिन्न सांस्कृतिक गतिविधिले पनि तिहारको रौनक थपेको थियो ।

यस वर्षको तिहारले परिवार, आफन्त र दाजुभाइ–दिदीबहिनीबीचको आत्मीयता, प्रेम र सम्बन्धलाई थप प्रगाढ बनाएको छ । भाइटीकासँगै पाँचदिने तिहार पर्व उल्लासमय वातावरणमा सम्पन्न भएको छ ।