
काठमाडौं । शरद् ऋतुमा हिमाल आरोहण गर्न नेपालसहित ७० देशका नागरिकले अनुमति लिएका छन् । विभिन्न देशका ८ सय ७० जनाले नेपालका हिमालमा आरोहण अनुमति लिएका हुन् ।
पर्यटन विभागका अनुसार, यस सिजनमा विभिन्न ३७ हिमाल आरोहणका लागि १ सय ११ आरोही समूहका २ सय २ महिला र ६ सय ६८ पुरुष गरी कुल ८ ७० जनाले अनुमति लिएका छन् ।
हिमाल आरोहणबापत ६ करोड ३५ लाख ७९ हजार ५३ रोयल्टी रकम सरकारी खातामा जम्मा भएको पर्यटन विभागका निर्देशक राकेश गुरुङले जानकारी दिए । शरद् ऋतुको आरोहण करिब अन्तिम चरणमा पुगेको उनले बताए ।
निर्देशक गुरुङका अनुसार, मनास्लु र हिम्लुङको आरोहण सकिएको छ । अमादब्लमलगायत हिमालको आरोहण धमाधम भइरहेको छ । अहिले ससाना समूहमा आरोही आइरहेका भन्दै उनले अब दुई–चार जनाले मात्रै आरोहण अनुमति लिने अनुमान गरिएको बताए ।
विगतमा जस्तै यस सिजनमा पनि मनास्लु (८,१६३ मिटर) हिमाल आरोहणमा सर्वाधिक २८ आरोही समूहका ३ सय ८ जनाले अनुमति लिएको विभागको पर्वतारोहण शाखाले जनाएको छ ।
अमादब्लम आरोहणका लागि १४ आरोही समूहका १ सय ५८, हिम्लुल आरोहणका लागि १० आरोही समूहका १ सय २४ तथा धौलागिरिमा एक आरोही समूहका १४, मकालुमा एक आरोही समूहका दुई आरोहीले अनुमति लिएका छन् । रासस

























