एभरेस्टको ‘कारखाना’ प्रदर्शनी 

विराटनगर । विराटनगरको एभरेस्ट सेकेन्डरी स्कुलमा शनिबार ‘कारखाना’ प्रदर्शनी भएको छ । स्कुलमा अध्ययनरत विद्यार्थीले आफूले जानेका विषयवस्तु समेटेर तयार गरिएको परियोजनालाई सार्वजनिक गरिएको कार्यक्रमलाई ‘कारखाना’ मार्फत प्रदर्शनी गरिएको हो ।

‘कारखाना’ प्रदर्शनीमा कक्षा ६ देखि ९ सम्मका विद्यार्थीहरूले आआफ्ना पाठ्यक्रममा रहेका विषयवस्तुलाई व्यवहारतः विभिन्न उपकरणमार्फत प्रस्तुति देखाएका थिए ।

Advertisement

विद्यार्थीले आफैँले तयार पारेका परियोजनालाई प्रदर्शनीमा हेर्न पुगेका अभिभावकलाई उनीहरूले  तर्कसहित आविष्कारहरूले कसरी काम गर्छ ? तिनको उपयोगिता कस्तो हुन्छ ? आविष्कारहरूले मानव जीवनलाई कसरी सहज बनाउँछ जस्ता विषयमा अभिभावकलाई बुझाएका थिए ।

अभिभावकहरूले यस्ता क्रियाकलापले बालबालिकाको सिकाइ क्षमतालाई निकै प्रभावकारी बनाउने बताए । उनीहरूले आफ्ना बच्चाले तयार पारेको परियोजना देखेर खुसी लागेको बताएका थिए ।

करिब ८ सय विद्यार्थीले विभिन्न समूहमा रहेर सयौँ परियोजना कार्यहरूको प्रदर्शनी गरेका थिए । विद्यालयका भाइस प्रिन्सिपल कुन्दन पुरीले विद्यार्थीहरूले कक्षा कोठामा सिकेको सैद्धान्तिक ज्ञानलाई व्यवहारमा उतारेर देखाउने यो महत्त्वपूर्ण स्थल रहेको बताए ।

स्कुलले बालबालिकामा अन्वेषण र आविष्कारमा चासो बढोस् भन्ने उद्देश्यका साथ कारखानासँग सहकार्य गर्दै आएको बताइएको छ ।

विद्यालयका प्रिन्सिपल टीकाराम पुरीले एभरेस्टले हरेक वर्ष यस्ता गतिविधि गर्दै आएको स्मरण गर्दै यस्ता कार्यक्रमले विद्यार्थीमा समूहमा काम गर्ने, आत्मविश्वासमा वृद्धि हुने तथा अन्वेषणमा रुचि बढ्ने विश्वास व्यक्त गरे ।