
पोखरा । पूर्वगृहमन्त्री एवं राष्ट्रिय स्वतन्त्र पार्टी (रास्वपा)का सभापति रवि लामिछानेलाई सहकारी ठगी प्रकरणको अनुसन्धानका लागि तत्काल बुटवल नलगिने भएको छ ।
अब केही दिन उनी कास्की प्रहरीकै हिरासतमा रहने छन् । जिल्ला अदालत कास्कीका न्यायाधीश चन्द्रकान्त पौडेलको इजलासले लामिछानेमाथि अनुसन्धान गर्न मंगलबार (आज) थप १० दिनको म्याद दिएको छ ।
लामिछाने कात्तिक २ गते काठमाडौंबाट पक्राउ परेका थिए । अनुसन्धानका लागि दोस्रोपटक थप गरिएको म्याद कात्तिक १५ गते नै सकिएको थियो । तर, तिहार बिदा भएकाले तेस्रोपटक म्याद थप गरिएको थिएन । प्रहरीको हिरासतमै राखिएको थियो ।
यसअघि थप गरिएको म्याद सकिएकै दिनदेखि गणना हुने गरी पुनः तेस्रोपटक म्याद थप भएको अदालतका सूचना अधिकारी अधिकारी सुरज अधिकारीले बताए । प्रहरीले भने अनुसन्धानका लागि २५ दिनको म्याद मागेको थियो ।
पोखराको सूर्यदर्शन सहकारी ठगी प्रकरणमा लामिछानेमाथि अनुसन्धान भइरहेको छ । पहिलोपटक ७ दिन र दोस्रोपटक ८ दिनको म्याद थप भएको थियो । उनीमाथि संगठित अपराध र सम्पत्ति शुद्धीकरणमा पनि अनुसन्धान भइरहेको प्रहरीले जनाएको छ ।
पार्टी सभापति लामिछाने पक्राउ परेपछि रास्वपा आन्दोलित छ । लामिछानेलाई अदालत लैजाने क्रममा आज पनि रास्वपाका नेता कार्यकर्ताले पोखरामा प्रदर्शन गरेका थिए । निषेधित क्षेत्र तोड्न खोजेपछि प्रहरीले अश्रुग्यास प्रहार गरेको थियो ।
कास्की अदालतले थप अनुसन्धानका लागि म्याद नदिए लामिछानेलाई बुटवल लैजाने प्रहरीको तयारी थियो । जिल्ला अदालत रुपन्देहीले यसअघि नै पक्राउ अनुमति दिइसकेको छ ।
त्यसका आधारमा रुपन्देही प्रहरीले लामिछानेलाई उपस्थित गराउन कास्की प्रहरीलाई पत्राचार गरिसकेको छ । बुटवलको सुप्रिम बचत तथा ऋण सहकारी ठगीको अनुसन्धान गर्न लामिछानेलाई उपस्थित गराउन पत्राचार गरिएको थियो ।
तर, कास्की अदालतले अनुसन्धानका लागि म्याद दिएपछि तत्काल उनलाई बुटवल नलगिने भएको छ । कास्कीमा अनुसन्धान सकिएपछि मात्रै बुटवल लगिने प्रहरीले जनाएको छ ।

























