ग्रामथानमा जनप्रतिनिधिबीच विवाद : ‘अध्यक्षले माओवादी कार्यकर्ता लगाएर गाडी खोसे’

Share this
705shares
मुलुकी खबर
मुलुकी खबर
clock२०८१ फागुन २४, शनिबार १७:५९

विराटनगर । मोरङको ग्रामथान गाउँपालिकामा जनप्रतिनिधिबीच बढेको विवाद उत्कर्षमा पुगेको छ ।

उपनिर्वाचनबाट ग्रामथानको अध्यक्षमा नेकपा (माओवादी केन्द्र)का नमोनारायण माझी निर्वाचित भएपछि जनप्रतिनिधिबीच विवाद चुलिएको हो । अध्यक्ष नमोनारायणविरुद्ध अरु जनप्रतिनिधि १ ठाउँमा उभिएका छन् । नेपाली कांग्रेस र नेकपा (एमाले)बाट निर्वाचित जनप्रतिनिधिले अध्यक्ष एकलौटी एवं मनपरी रूपमा अघि बढ्न खोजेको आरोप लगाए ।

विराटनगरमा शुक्रबार साँझ पत्रकार सम्मेलन गर्दै उनीहरुले अध्यक्षको गलत रवैयाको सिकार सिंगो गाउँपालिका भइरहेको गुनासो गरे । गाउँपालिका उपाध्यक्ष गुणवतीदेवी थारु, वडाध्यक्षहरु सुरेशकुमार माझी, यादव खतिवडा, भेषनारायण चौधरी, वीरेन्द्र चौधरीलगायतका जनप्रतिनिधिले पत्रकार सम्मेलनमार्फत अध्यक्षको शैलीप्रति आपत्ति जनाएका छन् । उनीहरु कांग्रेस र एमालेबाट निर्वाचित जनप्रतिनिधि हुन् ।

ग्रामथान–१ का वडाध्यक्ष सुरेशकुमार माझीका अनुसार आफूले चाहेको व्यक्तिलाई गाउँपालिका अध्यक्ष नमोनारायणले लोहोन्द्रा खोलाको ठेक्का दिलाउन खोजेका थिए । तर, अरु जनप्रतिनिधिले साथ दिएनन् । आफ्नो योजनाअनुसार अघि बढ्न नपाएपछि उनी अराजक शैलीमा प्रस्तुत भइरहेको र अरु जनप्रतिनिधिलाई अपमान गर्ने गरेको सुरेशले बताए ।

हुन त नमोनारायण यसअघि पनि माटो तस्करीको विवादमा मुछिएका थिए । माटो तस्करी रोक्न प्रहरीलाई पत्राचार गरेकै कारण उनले तत्कालीन प्रमुख प्रशासकीय अधिकृत रामराज पौडेललाई स्पष्टीकरणसमेत सोधे । उपाध्यक्षसहितको टोलीले अनुगमन गर्दा माटो तस्करी भइरहेको देखेर रोक्नका लागि प्रहरीलाई पत्राचार गरिएको कर्मचारीहरु बताउँछन् ।

आफूलाई साथ नदिएपछि नमोनारायणले मंगलबार उपाध्यक्ष गुणवती चौधरीसहितका जनप्रतिनिधिले चढ्दै आएको गाडी र मोटरसाइकल खोसेका छन् । वडाध्यक्ष सुरेशकुमार माझीको घरमै पुगेर उनले मोटरसाइकल कब्जामा लिए । अध्यक्षले माओवादी कार्यकर्ता लगाएर गुण्डागर्दी शैलीमा सवारीसाधन नियन्त्रणमा लिएको गुनासो जनप्रतिनिधिको छ ।

गाउँपालिका अध्यक्ष नमोनारायणले सवारीसाधन फिर्ता गर्न जनप्रतिनिधिलाई पत्र नै पठाए । केही जनप्रतिनिधिको गाडी तत्कालै खोसे । फिर्ता नगर्नेको भेटिएकै ठाउँबाट नियन्त्रणमा लिन थाले ।

‘जनप्रतिनिधिले प्रयोग गर्दै आएका सवारीसाधन माओवादी कार्यकर्ता र प्रहरी लगाएर जबरजस्ती घर, कार्यालय र बाटोबाटै खोसेर लैजाने काम भएको छ । गाउँसभा तथा परिषद्बाटै पारित गरेर जनप्रतिनिधिले सवारीसाधनको सुविधा लिएका हौं,’ सुरेश भन्छन्, ‘व्यक्तिगत स्वार्थ र एजेन्डामा जबरजस्ती सहमति गराउन खोज्दा हामीले मानेनौं । त्यो रिस अरु जनप्रतिनिधिमाथि पोख्ने काम भइरहेको छ ।’

गाउँपालिका उपाध्यक्ष गुणावतीले ‘म अध्यक्ष र स्थानीय सरकार हुँ, पालिका मेरो हो’ भन्दै जेपनि गर्न सक्ने धम्की गाउँपालिका अध्यक्षले दिने गरेको बताइन् । कार्यपालिका बैठकमा धम्की दिने र बहुमतको कदर नगर्ने काम अध्यक्षले गरिरहेको उनको भनाइ छ । निर्णयार्थ पेस गरेका एजेन्डाहरु पास नहुँदा अध्यक्ष नमोनारायण अमर्यादित ढंगले प्रस्तुत हुने र अवैधानिक गतिविधि गर्ने गरेको गुणावती बताउँछिन् ।

उनका अनुसार कार्यपालिकाको बैठकका निर्णयहरु कार्यपालिका सदस्यलाई ३ दिनभित्र दिनुपर्ने कानुनी व्यवस्थाको उल्लंघन अध्यक्षले गरिरहेका छन् । ‘अध्यक्षले जनप्रतिनिधि र लब्धप्रतिष्ठित व्यक्तिहरुलाई निरन्तर अपमान गर्ने गरिरहेका छन्,’ उनले भनिन् ।

ग्रामथान–७ का वडाध्यक्ष एवं गाउँपालिकाका प्रवक्ता वीरेन्द्र चौधरी अध्यक्षले शिक्षा र पोषण सम्बन्धी पुरानो समिति विघटन गरी एकलौटी निर्णयबाट नयाँ समिति बनाएको बताउँछन् । संघीय सरकारको २ करोड ७५ लाखको बहुपोषण क्षेत्रीय कार्यक्रमका लागि बनाइएको समितिमा रहेकालाई निकालेर अध्यक्षले मनोमानी हिसाबबाट आफूनिकटलाई समितिमा राखेको उनको भनाइ छ ।

उक्त कार्यक्रमको समितिमा चनरदेवी मुसहर र श्यामवतीदेवी थारु खाँ थिए । तर, अरु जनप्रतिनिधिलाई नसोधिकन उनीहरुलाई हटाएर अध्यक्षले सुमनकुमारी चौधरी र गोमा महलदारलाई समितिमा राखेको वीरेन्द्र बताउँछन् ।

उनका अनुसार अध्यक्ष माझी निर्वाचित भएर आएदेखि नै आफूनिकट व्यवसायीलाई लोहोन्द्रा खोला ठेक्का दिन खोजेका थिए । तर, गुणावती कार्यवाहक अध्यक्ष हुँदा नै उक्त खोला ३ करोड १५ लाखमा ठेक्का लागिसकेको र सम्झौता हुन मात्रै बाँकी रहेको वीरेन्द्रको भनाइ छ । उपनिर्वाचनपछि ठेक्का सम्झौता गर्नुपर्नेमा त्यो हुन नसकेको उनले बताए ।

लामो समयसम्म कार्यपालिका बैठक नबोलाएका अध्यक्षले अहिले आएर ‘ठेक्का बदर गरौं’ भन्दै आफूनिकटलाई खोला जिम्मा लगाउन खोजिरहेको अरु जनप्रतिनिधिहरु बताउँछन् । खोलाको ठेक्काको विषयमा कुरा नमिलेपछि जनप्रतिनिधिबीच विवाद सुरु भएको हो । लामो समयसम्म बैठक नबोलाएर कार्यपालिकालाई अनिर्णयको बन्दी बनाएको जनप्रतिनिधिको गुनासो छ ।

ग्रामथान–२ का वडाध्यक्ष यादव खतिवडा गाउँपालिका अध्यक्षले मनोमानी गरिरहेको बताउँछन् । उनका अनुसार अध्यक्ष तानासाही बनेकाले गाउँपालिकामा समस्या सिर्जना भएको छ । ‘गाउँपालिकाको विकासका लागि हामी मिलेर जान तयार छौं । तर, उहाँ मनपरी ढंगले अघि बढ्न खोज्नु हुन्छ । अवैधानिक काममा साथ दिन सकिँदैन,’ यादवले भने, ‘कार्यपालिका बैठकमा अरुलाई बोल्न नदिने, बोल्न खोज्दा बैठकबाटै निकाल्न खोज्नेजस्ता अराजक शैली अपनाइन्छ । त्यो गलत हर्कत रोकिनुपर्छ । अरु जनप्रतिनिधिमाथि गरिएको अपमान सहन सक्दैनौं ।’

उनका अनुसार अध्यक्ष नमोनारायणले गाउँपालिकालाई विकृति र विसंगतिको बाटोतर्फ डोर्याउने काम गरिरहेका छन् । अध्यक्षको मनोमानीविरुद्ध कानुनी उपचारमा जानलाई परामर्श गर्ने काम भइरहेको खतिवडाले बताए । ‘प्रमुख जिल्ला अधिकारीसँग पनि समन्वय भइरहेको छ,’ उनले भने ।

अध्यक्ष नमोनारायणले माघ ३० गते कार्यपालिका बैठक बोलाएर गणपुरक संख्या नपुगी विभिन्न निर्णय गरेका थिए । उक्त बैठक कानुनविपरित रहेको दाबी गर्दै गाउँपालिकाकी उपाध्यक्ष गुणवतिदेवी थारूसहित कार्यपालिकाका ८ जना सदस्यले फागुन ४ गते उच्च अदालत विराटनगरमा रिट दायर गरे ।

उच्चले गाउँपालिका अध्यक्षको निर्णय कार्यान्वयन नगर्न आदेश दिएको छ । न्यायाधीशद्वय राज्यलक्ष्मी बज्राचार्य र राजेन्द्र अधिकारीको संयुक्त इजलासले अध्यक्ष माझीले एकपक्षीय रूपमा गरेको कार्यपालिका बैठकको निर्णय कार्यान्वयन नगर्न परमादेश जारी गरेको हो । आफूले गरेको निर्णयविरुद्ध अदालतमा रिट परेपछि नमोनारायण उपाध्यक्षसहितका जनप्रतिनिधिसँग क्रुद्ध बनेका छन् ।

अध्यक्ष नमोनारायणले भने आन्तरिक स्रोतले धान्न नसक्ने भएकाले जनप्रतिनिधिको गाडी फिर्ता लिएको । पत्र नै पठाएर गाडी फिर्ता लिएको उनको भनाइ छ । माझीले आफू पनि सरकारी गाडी नचढ्ने बताए ।

‘कर जनताले तिरेका हुन् । जनताको काम नगर्ने अनि सुविधा मात्रै लिन खोज्ने त भएन नी । आन्तरिक स्रोत जुटाउन काम नगर्नेले सुविधा लिन मिल्दैन । गाउँपालिकाकलो गरेको निर्णयविरुद्ध उच्च अदालत जाने काम भयो,’ नमोनारायण भन्छन् ।

तपाइको प्रतिक्रिया
कोशी र गण्डकीका हिमाली क्षेत्रमा वर्षा र हिमपातको सम्भावना
स्थानीय निर्वाचनको तयारीमा एमाले, ३ हजार ४१४ नेता–कार्यकर्तासहितको राष्ट्रिय भेला
यस्तो छ विदेशी मुद्राको विनिमय दर
यस्तो छ विदेशी मुद्राको विनिमयदर
पटकाको बारुद चुलोमा हाल्दा जलेर सुनसरीका बालक घाइते
अस्पतालको आशामा जग्गा दिए, नबनेपछि मुख्यमन्त्री कार्यालय अगाडि आमरण अनशन
भुटानी शरणार्थी र राजनीतिक बन्दीको विषय उठाउन आग्रह
भन्सार छली सुन लैजान खोज्ने चिनियाँ नागरिक पक्राउ
खराब मौसमले विराटनगरका बिहानका सबै उडान रद्द, सयौँ यात्रु प्रभावित
इनम सापकोटा प्रकरणमा सरकारको अनुसन्धानमाथि पोखरेलको प्रश्न
कनकाईमा आगजनीबाट दुई कुन्यूको धान र पराल नष्ट
© 2024 Muluki Khabar. All Rights Reserved. Design & Develop By: Indesign Media Pvt. Ltd.