‘सेटिङ’मा खुलेआम धन्दा : प्रहरीले देखेन गाँजा ‘प्याकिङ’ गर्ने पूर्ववडाध्यक्षको घर !

विराटनगर । धनकुटा जिल्लाको सहिदभूमि गाउँपालिका–१ स्थित पूर्ववडाध्यक्ष अशोक राईको घरमा गाँजा ‘प्याकिङ’ भइरहेको दृश्य स्पष्ट देखिने भिडियो सार्वजनिक भएको छ ।

अनुहार खुला, ठेगाना निश्चित, गतिविधि छर्लङ्ग देखिने भिडियोका बाबजुद प्रहरी प्रशासनले भने घर नै नभेटिएको भन्दै आँखा चिम्लिएको छ । राईको घरमा खुलेआम गाँजा सुकाउँदै, प्याक गर्दै, बोरामा भरिरहेको भिडियो सार्वजनिक भएपछि प्रहरी ‘अप्रेशन’मा खटिएको थियो । तर, कारबाहीको साटो रित्तो हात फर्किएको घटनाले सुरक्षा संयन्त्रको भूमिकामाथि गम्भीर प्रश्न उठेको छ ।

गाँजा ‘प्याकिङ’ भइरहेको भनेर स्थानीयले गत शनिबार दिउँसो प्रहरीलाई जानकारी दिएका थिए । उनीहरूले ‘लोकेसन’सहितको भिडियो प्रमाण बुझाएपछि टोली घटनास्थलतर्फ गयो । तर, प्रहरी राईको घरसम्म पुग्दै पुगेन ।

उल्टै प्रहरी आउँदै गरेको जानकारी पाएपछि गाँजा लुकाइयो । घर नदेखिएको भनेर प्रहरी फर्कियो । त्यो घटनाले प्रहरीको भूमिकालाई शंकास्पद बनाएको छ । मिलेमतोमा काम भइरहेको प्रष्ट हुन्छ ।

कोशी प्रदेशका प्रहरी प्रमुख डीआईजी ईश्वर कार्की गाँजा ‘प्याकिङ’स्थलमा प्रहरी पुगे पनि ‘भिडियोमा देखिएको घर नभेटिएको’ दाबी गर्छन । कार्कीले आफू त्यो समयमा काठमाडौंमा रहेको बताए ।

‘टोली गएको थियो । तर, जसरी भिडियोमा देखिएको घर भनिएको छ, त्यो भेटिएन रे,’ कार्कीले भने, ‘बाटो खराब रहेछ । बाटो खराब भएकाले मोटरसाइकलमा र पैदल हिँड्नुपर्ने रहेछ ।’ पूर्ववडाध्यक्षकै घर ‘देखिएन’ भनेर डीआईजी कार्कीले दिएको प्रतिक्रिया नै शंकाको घेरमा परेको छ ।

प्रहरीमाथि ‘सेटिङ’ गरेर गाँजाको धन्दा चलाइरहेको आरोप लागेको छ । प्रहरीको पछिल्लो गतिविधिले गृह प्रशासन र प्रहरीका उच्च अधिकारीसँग मिलेर राईले धन्दा चलाइरहेको आशंकामा बल पुगेको छ ।

स्रोतका अनुसार प्रहरी टोली वास्तवमै राईको घर भएको ‘लोकेसन’मा पुगेको छैन । गाँजा ‘प्याकिङ’स्थलमा नपुगेको प्रहरीले घर नै ‘भेटिएन’ भनेर बहाना बनाएको हो । भिडियोमा भने पूर्ववडाध्यक्ष राईको घरको आँगनमा युवाहरू गाँजा सुकाउँदै र बोरामा ‘प्याकिङ’ गर्दै गरेको देखिन्छ ।

भिडियोमा सबैको अनुहार खुलेको छ । घर, घरको ढोका, आँगन, वरपरको दृश्यसमेत प्रष्ट देखिन्छ । यस्तो अवस्थामा पनि प्रहरीले नदेखेझैँ गर्नु र कारबाही नगर्नुलाई अस्वभाविक मानिएको स्थानीय बताउँछन् ।

स्थानीय भन्छन्, ‘उक्त घर सहिदभूमि गाउँपालिकाका पूर्ववडाध्यक्ष अशोक राईकै हो । उनलाई गाउँका सबैले चिन्छन् । घरको ठेगाना सामान्य जानकारीको विषय हो । तर, ‘भेटिएन’ भन्दै प्रहरी पन्छिनुले राजनीतिक पहुँचका कारण उनलाई जोगाइएको प्रष्ट हुन्छ । यसमा प्रहरीको पनि मिलेमतो छ ।’

त्यति मात्रै होइन, घरमा गाँजाको धन्दा चलिरहेको भिडियो सार्वजनिक भएपछि राईले सामाजिक सञ्जालमा धम्कीपूर्ण अभिव्यक्ति दिएका छन् । उनले बुधबार लेखेका छन्, ‘मेरो बारेमा अझै को–कसलाई लेख्न बाँकी छ लेखिहाल्नुस् है । मेरो बारे कसैले लेख्दा उहाँहरूको चुलोमा आगो बल्छ भने पनि लेखिहाल्नुस् ।’ यो स्टाटसलाई धेरैले पत्रकार र अभियन्ता लक्षित धम्कीका रूपमा बुझेका छन् ।

उक्त स्टाटसमाथि आएका कमेन्टहरू झनै आपत्तिजनक छन् । १ जनाले लेखेका छन्, ‘सहिदभूमिमा आएर सोध, अशोक राई को हो भनेर । एक प्रतिशत पनि नराम्रो भन्ने मान्छे भेटिने छैन । चुनौती चिन्छु, निकालेर देखाउन । साला पत्रुकार, तेरो दिनगन्ती सुरु भयो ।’

यस्तै अर्को कमेन्टमा लेखिएको छ, ‘घरनजिकैको दुस्मनी हुन सक्छ । नत्र कसले फोटोसहित दिन्छ ? अनि के को भिक मागिरहेको होला सतुरले नि ? ढिलो होला, तर अवसे चिनिन्छ । तो चुलो बाल्ने नि साथी ।’

कमेन्टहरूमा गाँजा बेच्ने कामलाई नै बचाउने, समर्थन गर्ने अभिव्यक्तिहरु आएका छन् । अर्को कमेन्टमा लेखिएको छ, ‘गाँजा बेचेको पैसा विदेशी डलर हो, बन्द गरेर होइन, लिगल बनाएर गर्ने हो । अरुले नगरे, तपाईं हामीले गर्ने हो ।’

स्थानीय जनप्रतिनिधिहरूका अनुसार सहिदभूमिमा गाँजा खेती र तस्करी सामान्यजस्तै बनेको छ । गाउँका धेरै युवाहरू गाँजा मुद्दामा जेल परिसकेका छन् । तर, पूर्ववडाध्यक्षजस्ता प्रभावशाली पात्रहरू फरार प्रतिवादी भएर पनि धरौटीमा छुट्छन् । अनि धम्कीपूर्ण स्टाटस लेख्दै सामाजिक सञ्जालमा सत्तोसराप गर्छन् ।

स्रोतका अनुसार प्रहरीसँग भिडियोलगायतका स्पष्ट प्रमाणहरु छन् । नाम, ठेगाना, अनुहार सबै खुलेको छ । तर, प्रहरी अहिलेसम्म न घर पुगेको छ । न त कुनै सोधपुछ नै भएको छ । डीआईजी कार्कीलाई सामाजिक सञ्जालमा आएको धम्कीपूर्ण अभिव्यक्तिबारे जिज्ञासा राख्दा ‘साबर ब्युरोमा गएर बुझ्नु’ भन्दै उनी पन्छिए ।

पछिल्लो समय प्रश्न उठेको छ, ‘के प्रहरीले साँच्चिकै अपराध देख्दैन कि देखेपनि नदेखेझैँ गर्छ ? के प्रहरी राजनीतिक पहुँच भएका मानिसहरूका अगाडि पंगु भएको हो ?’ सामाजिक सञ्जालमा धम्की दिइँदा र प्रष्ट प्रमाण हुँदाहुँदै पनि प्रहरी प्रशासनले चुप लाग्नु भनेको कानुनको शासनलाई लत्याउने दुस्साहस भएको स्थानीय बताउँछन् ।

सहिदभूमिको यो घटनाले गाँजा कारोबारको संगठित स्वरूप देखाउँछ । प्रहरी र प्रभावशालीबीचको साठगाँठ, उदासीनता र संरक्षणको नमुना पनि हो । तर, प्रहरी भने संवेदनशील भएर अनुसन्धान गरिरहेको दाबी गर्छ । अहिलेसम्म कुनै कारबाही भएको छैन । स्थानीयले मिलेमतोकै कारण खुलेआम गाँजाको धन्दा चलिरहेको बताएका छन् ।

यस विषयमा बुझ्न खोज्दा पूर्ववडाध्यक्ष राई भने सम्पर्कमा आउने चाहेनन् । बारम्बार गरेको फोन उनले उठाएनन् ।

राजनीतिक आडमा गाँजाको साम्राज्य, पूर्ववडाध्यक्षको संलग्नता