
मोरङ । मोरङको ग्रामथान गाउँपालिकामा प्रहरीले कौडा खेलिरहेको अवस्थामा ४ जनालाई नगद र कौडासहित नियन्त्रणमा लिएको छ। विशेष सूचनाका आधारमा इलाका प्रहरी कार्यालय बेलबारीबाट प्रहरी निरीक्षक राजिव गिरीको कमाण्डमा खटिएको टोलीले ग्रामथान–४ स्थित जुरीखोला छेउको बाँसझ्याङमा छापामारी उनीहरूलाई पक्राउ गरेको हो। शनिबार साँझ करिब ६ बजेको समयमा हारजित हुने गरी जुवा खेलिरहेको अवस्थामा प्रहरी पुगेको थियो।
बरामद सामान र पक्राउ पर्नेहरू प्रहरीले जुवाको खालबाट ३ लाख १३ हजार रुपैयाँ नगद र १६ थान कौडा बरामद गरेको छ। पक्राउ पर्नेहरूमा जय किशोर साह (५७ वर्ष), इटहरी–९, हेमन्त राई (५६ वर्ष), हतुवागढी–३, भोजपुर (हाल धरान निवासी), सोनलाल राजवंशी (४२ वर्ष), कटहरी–१, इन्द्र आचार्य (४७ वर्ष) सुन्दरहरैचा–५, मोरङ छन्।
पक्राउ परेका व्यक्तिहरूलाई बरामद रकम र कौडासहित इलाका प्रहरी कार्यालय बेलबारीमा राखेर थप अनुसन्धान भइरहेको प्रहरीले जनाएको छ। उनीहरू विरुद्ध जुवा ऐन अन्तर्गत कानुनी कारबाही अगाडि बढाइनेछ।

























