चलचित्र ‘कुमारी’ मा ‘नोस्टाल्जिक’ प्रेम

काठमाडौँ । माघ २३ गतेबाट देशव्यापी प्रदर्शनमा आउन लागेको प्रतीक्षित प्रेम कथानक चलचित्र ‘कुमारी’को तेस्रो गीत ‘डोको बुन्ने’ सार्वजनिक गरिएको छ। नयाँ बानेश्वरस्थित वन सिनेमाजमा आयोजित पत्रकार भेटघाट कार्यक्रमका बीच यो गीत सार्वजनिक गरिएको हो। यसअघि सार्वजनिक भएका ‘कता छौ मेरो फूल’ र ‘तिमी बिना’ गीतको सफलतापछि निर्माण टिमले लोक शैलीको यो नयाँ सिर्जना ल्याएको हो।

गीतको टिम र प्रस्तुतिका सार्वजनिक गरिएको ‘डोको बुन्ने’ गीतमा गायक केहर सिं लिम्बुको स्वर रहेको छ भने सागर लामिछाने मगर र सुमन तामाङका शब्दहरू समेटिएका छन्। सुमन तामाङ र केहर सिं लिम्बुले नै सङ्गीत भरेको यस गीतलाई रिकेश गुरुङले मिक्सिङ र मास्टरिङ गरेका हुन्। शिशिर खातीको कोरियोग्राफी रहेको भिडियोमा मुख्य कलाकारहरू अबिषेक खड्का र आकृति राजभण्डारीलाई पुराना दिनको शैलीमा प्रस्तुत गरिएको छ। गीतले नवयुवाहरूबीच मौलाएको प्रेम भावलाई सुन्दर ढङ्गले बोलेको छ।

निर्देशक र लेखकको भनाइ कार्यक्रममा बोल्दै निर्देशक दिनेश राउतले आफ्ना सफल प्रेम कथानक चलचित्रहरू ‘आई एम सरी’, ‘नोभेम्बर रेन’, ‘क्लासिक’ पछि ‘प्रसाद’, ‘पुजार सार्की’ र ‘प्रकाश’ जस्ता सामाजिक विषयमा काम गरेको र अहिले पुनः आफ्नो प्रिय विधा प्रेमकथामा फर्किएको बताए। उनले ‘डोको बुन्ने’ गीतले चलचित्रको मौलिकता र नेपालीपनलाई प्रतिनिधित्व गर्ने धारणा राखे। यस्तै, लेखक विकास सुवेदीले यो गीतले चलचित्रको भाव व्यक्त गर्ने र दर्शकलाई प्रेमकथामा समाहित गराउने विश्वास व्यक्त गरे।

डेब्यु कलाकारहरूको अनुभव मुख्य भूमिकामा रहेका अबिषेक खड्का र आकृति राजभण्डारीले यसै चलचित्रबाट डेब्यु गर्न पाउँदा खुसी व्यक्त गरे। राजभण्डारीले चलचित्रको टिम र स्क्रिप्ट उत्कृष्ट लागेकाले यो चलचित्र रोजेको बताइन्। यस्तै, खड्काले सानैदेखिको अभिनय गर्ने इच्छा यस चलचित्रमार्फत पुरा भएको उल्लेख गरे। कार्यकारी निर्माता केदार भुसालले ‘भ्यालेन्टाइन डे’को छेको पारेर रिलिज हुन लागेको यस चलचित्रले सबै उमेर समूहका दर्शकलाई बाँध्ने दाबी गरे।

निर्माण र वितरण पक्ष चलचित्रमा अबिषेक र आकृतिका साथै घनश्याम जोशी, सुनिता श्रेष्ठ, आकाङ्क्षा कार्की, मधु खड्का, सनम श्रेष्ठ लगायतका कलाकारको अभिनय छ। महेन्द्र अधिकारीले निर्माण गरेको यस चलचित्रमा सुसन प्रजापतिको छायाङ्कन र सुप्रिम पराजुलीको सम्पादन छ। बिनिश इन्टरटेन्मेन्ट र पिक्चर फ्रेमको सहकार्यमा बनेको यस चलचित्रलाई काठमाडौँ उपत्यकामा डिसीएन र उपत्यका बाहिर कुवेर सिने डिस्ट्रीब्युशनले वितरण गर्दैछन्।