
काठमाडौं। प्रतिनिधिसभा निर्वाचनको प्रत्यक्षतर्फ सानदार नतिजा निकालेको राष्ट्रिय स्वतन्त्र पार्टी (रास्वपा) ले समानुपातिकतर्फ पनि आफ्नो बलियो वर्चस्व कायम गरेको छ । प्रत्यक्षतर्फ १०८ स्थानमा जित हासिल गरिसकेको रास्वपाले समानुपातिक मतगणनामा हालसम्म कुल सदर मतको ५० प्रतिशतभन्दा बढी मत प्राप्त गरेको हो ।
निर्वाचन आयोगले सार्वजनिक गरेको पछिल्लो विवरण अनुसार अहिलेसम्म २७ लाख ६१ हजार १५९ मत गणना सम्पन्न भएको छ । जसमा रास्वपाले १३ लाख ८८ हजार ४२१ मत पाएको छ । यो सङ्ख्या गणना भएको कुल मतको आधाभन्दा धेरै हो । रास्वपाको यो अग्रताले समानुपातिक निर्वाचन प्रणालीबाट पनि सो पार्टीले उल्लेख्य सिट प्राप्त गर्ने निश्चित देखिएको छ ।
समानुपातिकतर्फको प्रतिस्पर्धामा नेपाली कांग्रेस ४ लाख ७१ हजार ३५५ मतका साथ दोस्रो स्थानमा रहेको छ । नेकपा एमाले ३ लाख ८० हजार ९३२ मतसहित तेस्रो स्थानमा छ भने नेपाली कम्युनिस्ट पार्टीले एक लाख ८२ हजार ८३४ मत प्राप्त गरी चौथो स्थान ओगटेको छ । यस्तै राष्ट्रिय प्रजातन्त्र पार्टीले एक लाख एक हजार २२४ मत पाएको छ ।
अन्य दलहरूमध्ये श्रम संस्कृति पार्टीले ५६ हजार ६०३, राष्ट्रिय परिवर्तन पार्टीले ३६ हजार ४८८, जसपा नेपालले २४ हजार २४२ र जनमत पार्टीले १३ हजार १७८ मत प्राप्त गरेका छन् । देशभरका विभिन्न गणना केन्द्रहरूमा समानुपातिकतर्फको मतगणना अझै जारी रहेकाले रास्वपाको मत सङ्ख्या अझ बढ्ने अनुमान गरिएको छ ।
























