
सुनसरी । जेनजी विद्रोहपछि मुलुकको राजनीतिमा एउटा फरक धारको नेतृत्व गरिरहेका हर्कराज राई (साम्पाङ) सुनसरी–१ बाट प्रतिनिधि सभा सदस्यमा निर्वाचित भएका छन् । धरान उपमहानगरपालिकाको मेयरका रूपमा जनश्रमदानमार्फत कोकाहाको पानी खुवाएर चर्चा कमाएका साम्पाङले यसपटक आफ्नै नेतृत्वको श्रम संस्कृति पार्टीबाट ३५ हजार ७४१ मतसहित संसद्को यात्रा तय गरेका हुन् ।
साम्पाङ एक्लै मात्र नभई उनको पार्टीका अन्य दुई उम्मेदवार ध्रुवराज राई (भोजपुर) र आरेन राई (खोटाङ) ले पनि जित हासिल गरिसकेका छन् । ४३ वर्षीय साम्पाङले आफ्नो चुनावी घोषणापत्रमा ‘प्रकृति-संस्कृति-प्रविधि’ लाई समेटेर ‘हर्कवाद’ दर्शनको व्याख्या गरेका छन् ।
सन् २००७ मा साङ्गीतिक क्षेत्रमा लागेका र पछि वैदेशिक रोजगारीका लागि इराक र अफगानिस्तान पुगेका साम्पाङ नेपाल फर्किएपछि समाजका बेथितिविरुद्ध एक्लै सडक आन्दोलनमा उत्रिएका थिए । त्यही विद्रोही स्वभाव र जिद्दीपनले उनलाई पहिले मेयर र अहिले सांसदको कुर्सीमा पुर्याएको छ ।
संसद् छिर्दै गर्दा साम्पाङको तारोमा सबैभन्दा बढी राष्ट्रिय स्वतन्त्र पार्टी (रास्वपा) का नेताहरू देखिएका छन् । उनले रास्वपा सभापति रवि लामिछाने र वरिष्ठ नेता बालेन शाहको खुला आलोचना गर्दै आएका छन् । आइतबार मात्रै उनले सामाजिक सञ्जालमा लेखेका छन्, ‘सरकारको नेतृत्व रविले गर्दा राम्रो, नबोल्ने मान्छेले सदनमा जनताको प्रश्नको उत्तर दिन सक्दैन ।’ बालेन शाहतर्फ लक्षित उनको यो टिप्पणीका बाबजुद बालेनले भने साम्पाङको स्टाटसमा ‘तपाईँ र धरानलाई सधैँ माया रहन्छ’ भन्दै हार्दिकतापूर्ण प्रतिक्रिया दिएका छन् ।
दुई तिहाइको मतसहित रास्वपा सत्तामा जाने तयारीमा रहँदा सानै दलको नेतृत्व गरेर संसद् पुगेका साम्पाङको विद्रोही शैलीले कस्तो हलचल ल्याउला भन्ने धेरैको चासोको विषय बनेको छ । विशेषगरी बालेन शाहको नेतृत्वमा बन्ने भनिएको सरकारप्रति साम्पाङको सदनभित्रको भूमिका निकै रोचक हुने देखिएको छ ।
























