
काठमाडौं । देशभर मौसममा पश्चिमी न्यूनचापीय प्रणालीको आंशिक प्रभाव देखिएको छ । जल तथा मौसम पूर्वानुमान महाशाखाका अनुसार हाल उपल्लो वायुमण्डलमा रहेको उच्च चापीय प्रणाली र पूर्वी भू–भाग नजिक तल्लो वायुमण्डलमा विकसित न्यून चापीय क्षेत्रका कारण मौसममा बदलीको अवस्था छ ।
आज (शुक्रबार) कोशी प्रदेशसहित पहाडी र हिमाली भू–भागमा सामान्यतया बादल लाग्ने सम्भावना रहेको छ भने अन्य क्षेत्रमा आंशिक बदली रहने पूर्वानुमान गरिएको छ । कोशी, बागमती, गण्डकी र लुम्बिनी प्रदेशका पहाडी तथा हिमाली भेगका केही स्थानमा तथा कर्णाली र सुदूरपश्चिमका उच्च भू–भागका एक–दुई स्थानमा मेघगर्जन र चट्याङसहित हल्का वर्षा वा हिमपात हुन सक्ने सम्भावना रहेको महाशाखाले जनाएको छ ।
मधेश, बागमती र गण्डकी प्रदेशका तराईका केही स्थानमा पनि हल्का वर्षा हुन सक्ने अनुमान छ । शुक्रबार राति कोशी, बागमती र गण्डकीका पहाडी तथा हिमाली क्षेत्रमा आंशिकदेखि सामान्य बदली रहने र कतिपय स्थानमा हल्का वर्षा वा हिमपात हुन सक्ने जनाइएको छ ।
हिमपात र वर्षा हुने सम्भावना रहेका क्षेत्रका बासिन्दा तथा यात्रुहरूलाई सतर्कता अपनाउन मौसमविद्ले आग्रह गरेका छन् ।
























