
धनकुटा । धनकुटाको साँगुरीगढी गाउँपालिका–३ का वडाध्यक्ष टेकप्रसाद लिम्बूको उपचारको ेक्रममा निधन भएको छ ।
लामो समयदेखि आन्द्राको क्यान्सरबाट पीडित रहेका ५५ वर्षीय लिम्बू केही समयदेखि भारतको नयाँ दिल्लीस्थित अस्पतालमा उपचाररत थिए । २०७९ को स्थानीय तह निर्वाचनमा कांग्रेसबाट निर्वाचित लिम्बू सामाजिक तथा राजनीतिक क्षेत्रमा सक्रिय व्यक्तित्वका रूपमा परिचित थिए ।
स्थानीय विकास, सेवा प्रवाह र समुदायका समस्याहरू समाधानमा उनी सधैं अग्रसर रहन्थे । गाउँपालिका अध्यक्ष जितेन्द्र राईका अनुसार लिम्बूको निधनको शोकमा गाउँपालिकाले शुक्रबार सार्वजनिक बिदा दिएको छ ।
अन्त्येष्टिका लागि लिम्बूको पार्थिव शरीर जन्मस्थल धनकुटाको खुवाफोकमा ल्याइने तयारी भइरहेको अध्यक्ष राईले बताए । लिम्बूको योगदान र सक्रियताले स्थानीय समुदायमा गहिरो छाप छाडेको उनको भनाइ छ ।
























