
काठमाडौं । नेपालमा पश्चिमी वायुको प्रभाव कायम रहनुका साथै देशको पूर्वी भू–भाग नजिक तल्लो वायुमण्डलमा विकसित न्यून चापीय क्षेत्रको आंशिक प्रभाव रहेको जल तथा मौसम पूर्वानुमान महाशाखाले जनाएको छ ।
महाशाखाका अनुसार आज (शनिबार) बिहान बागमती र गण्डकी प्रदेशसँगै कोशी प्रदेशका पहाडी तथा हिमाली भू–भागमा सामान्यदेखि बाक्लो बादल लागेको छ भने अन्य प्रदेशका पहाडी तथा हिमाली क्षेत्रमा आंशिक बदली रहेको छ । गण्डकी प्रदेशका केही पहाडी क्षेत्र र बागमती प्रदेशको तराईका थोरै स्थानमा मेघगर्जन तथा चट्याङसहित मध्यम वर्षा भइरहेको महाशाखाले छ ।
शनिबार दिउँसो कोशी र सुदूरपश्चिम प्रदेशसहित देशका अधिकांश पहाडी तथा हिमाली भू–भागमा सामान्य बदली तथा अन्य स्थानमा आंशिक बदली रहने पूर्वानुमान गरिएको छ । कोशी, बागमती, गण्डकी र लुम्बिनी प्रदेशका पहाडी तथा हिमाली क्षेत्रका थोरै स्थानमा तथा कोशी प्रदेशको तराईका केही स्थानमा चट्याङसहित मध्यम वर्षा हुने सम्भावना छ ।
कर्णाली र सुदूरपश्चिम प्रदेशका पहाडी भू–भागका एक–दुई स्थानमा पनि वर्षा हुन सक्ने अनुमान गरिएको छ । राति पनि हिमाली भू–भागमा सामान्य बदली रहने र पहाडी भू–भागका केही स्थानमा मेघगर्जन तथा चट्याङसहित मध्यम वर्षा तथा हिमपातको सम्भावना रहेको महाशाखाले जनाएको छ ।
























