
मोरङ। मोरङको रतुवामाई नगरपालिका वडा नम्बर ३ स्थित मिर्चाडाँगी गाउँलाई जोड्ने रतुवा खोलामा निर्माणाधीन झोलुङ्गे पुलको काम अन्तिम चरणमा पुगेको छ।
नेपाल सरकार, सहरी विकास मन्त्रालय अन्तर्गतको स्थानीय पूर्वाधार विकास विभागद्वारा निर्मित ‘मिर्चडाँगी महादेवा मल्टिस्प्यान ट्रेल ब्रिज’ को निर्माण कार्य लक्ष्यभन्दा निकै अगाडि नै सम्पन्न हुन लागेपछि स्थानीय बासिन्दामा उत्साह छाएको छ।
कुल ७ सय ४७ मिटर लम्बाइ रहेको यो पुल निर्माणका लागि थानी निर्माण सेवा प्राईभेट लिमिटेड, काठमाडौंले भ्याटसहित १९ करोड ८२ लाख ४४ हजार ६ सय ६२ रुपैयाँमा ठेक्का पाएको थियो। २०८२ असार ११ गते भएको ठेक्का सम्झौता अनुसार काम सम्पन्न गर्न २०८४ असार १० गतेसम्मको २४ महिनाको समय दिइएको थियो।
तर, निर्माण कम्पनीले तीव्र गतिमा काम गर्दै समय सीमाभन्दा १४ महिना अगावै निर्माण सम्पन्न गर्ने लक्ष्य राखेको छ। निर्माण व्यवसायी लोकबहादुर बस्नेतका अनुसार आगामी वैशाखको दोस्रो साताभित्रै सम्पूर्ण काम सकेर पुल सम्बन्धित निकायलाई हस्तान्तरण गरिनेछ।
नेपाल–भारत सीमा नजिकै पर्ने र ‘श्रीलङ्काको टापु’ का रूपमा प्रचलित मिर्चाडाँगीका बासिन्दाले बर्सेनि रतुवा खोलाको बाढीका कारण ज्यान जोखिममा पारेर आवतजावत गर्दै आएका थिए। पुल सञ्चालनमा आएपछि निकै लाभ हुने स्थानीय चन्दन सिंहले बताए।
अर्का स्थानीय हारिना देवी गनगाईले पुल नहुँदा रातिको समयमा कोही बिरामी परेमा भारतीय भूमि हुँदै अस्पताल लैजानुपर्ने बाध्यता अब हट्ने विश्वास व्यक्त गरिन्। पुल अभावकै कारण स्थानीयले उत्पादन गरेका सागसब्जी झापाको गौरीगञ्ज र मोरङका बजारसम्म पुर्याउन निकै सास्ती भोग्नुपरेको थियो।
पुलले यो समस्या सदाका लागि अन्त्य गर्ने भए पनि खोलामा तटबन्ध नहुँदा गाउँ नै जोखिममा पर्ने र सडकको पहुँच अझै पुग्न नसकेको स्थानीय सञ्जय सिंहको गुनासो छ।
























