
काठमाडौँ । प्रतिनिधि सभाका नवनिर्वाचित सांसदहरूको पद तथा गोपनीयताको शपथ र प्रारम्भिक बैठकहरू सिंहदरबारस्थित पुतली बगैँचामा निर्मित नयाँ संसद् भवनको बहुउद्देश्यीय हलमा हुने भएका छन्। नयाँ भवनको मुख्य हल निर्माण सम्पन्न हुन अझै समय लाग्ने भएपछि सङ्घीय संसद् सचिवालयले बहुउद्देश्यीय हललाई वैकल्पिक व्यवस्थाका रूपमा तयार पारेको हो।
सचिवालयका प्रवक्ता सहसचिव एकराम गिरीले मुख्य हल तत्काल तयार हुने अवस्था नदेखिएकाले सचिवालयको प्रयोजनका लागि बनाइएको बहुउद्देश्यीय हल प्रयोग गर्न लागिएको जानकारी दिए। उनका अनुसार उक्त हल आगामी ३ दिनभित्र पूर्ण रूपमा तयार भइसक्नेछ। मुख्य बैठक हल निर्माण कार्य कहिले सकिन्छ भन्नेबारे भने अझै यकिन भइसकेको छैन।
गत फागुन २१ गते भएको निर्वाचनबाट नयाँ सांसदहरू चुनिएर आएका छन्। निर्वाचित सांसदहरूको शपथ ग्रहणको मिति र पहिलो बैठक बस्ने समय भने अझै तय हुन बाँकी रहेको सचिवालयले जनाएको छ।
























