एकछिनमै खरानी भयो मोरङको मुसहर बस्ती

Share this
735shares
मुलुकी खबर
मुलुकी खबर
clock२०८२ चैत ४, बुधबार १५:४०

विराटनगर । अचानकको आगलागीमा जलेर मोरङको बूढीगंगा गाउँपालिका–४ को मुसहर बस्ती खरानी भएको छ । एकैछिनमै बस्ती खरानी भएको हो ।

प्रारम्भिक विवरण अनुसार बुधबार दिउँसो करिब २ बजेतिर आगलागी हुँदा १० वटा घरहरु जलेर पूर्ण रूपमा ध्वस्त भएका छन् । करिब ४५ मिनेटको आगलागीले स्थानीय मुसहर समुदायका परिवारलाई अत्यन्त संकटमा पारेको छ ।

प्रहरीका अनुसार गोकुवा चोकबाट पूर्वतर्फ रहेको बस्तीमा अचानक लागेको आगो तीव्र गतिमा फैलिएको थियो । प्रायः घरहरु फुसको छाना र टाटीबेराले बनेका थिए । आगोले बस्तीका घरहरु चाँडै जलेर ध्वस्त भएको प्रहरीले जनाएको छ ।

बस्तीका घरहरूको बनावट कमजोर भएकाले आगो तत्कालन नियन्त्रण गर्न सम्भव नभएको मोरङ प्रहरीका सूचना अधिकारी लीलाराज लामिछानेले बताए । उनका अनुसार इलाका प्रहरी कार्यालय नेमुवाबाट सई अशोक कार्कीको नेतृत्वमा टोली खटाइएको थियो भने जिल्ला प्रहरी कार्यालय मोरङबाट वरिष्ठ सई राजेन्द्र कटवालको टोली पनि परिचालन गरिएको थियो ।

विराटनगर महानगरपालिकाको दमकल र स्थानीयको सक्रिय प्रयासपछि करिब ४५ मिनेटमा आगो नियन्त्रणमा आएको जानकारी लामिछानेले दिए । तर, आगो नियन्त्रणमा आए पनि बस्तीका अधिकांश घर पूर्ण रूपमा नष्ट भइसकेका छन् ।

आगोले घरसँगै लत्ताकपडा, नगद, सुनचाँदी, अन्नपात र दैनिक प्रयोगका सामग्रीहरू जलेर नष्ट भएको प्रहरीले जनाएको छ । डीएसपी लामिछानेले क्षतिको विवरण संकलनको काम भइरहेको जानकारी दिए ।

आगोले घर खरानी बनाएपछि भूमिहीन र दैनिक ज्यालादारीमा निर्भर मुसहर समुदायका परिवारहरू अहिले खुला आकाशमुनि बस्न बाध्य भएका छन् । बालबालिका, वृद्धवृद्धा र महिलाहरू अत्यन्त त्रासमा रहेका छन् ।

सरोकारवालाहरूले पीडित परिवारलाई राहत, अस्थायी आवास र दीर्घकालीन पुनःस्थापनाको माग गर्न थालेका छन् । घटनाले अति विपन्न समुदायको असुरक्षित बसोबास र विपद् व्यवस्थापनको कमजोर तयारीलाई स्पष्ट पारेको छ । समयमै प्रभावकारी राहत र पुनःस्थापनाको व्यवस्था नभए पीडितहरूको अवस्था अझ जटिल बन्दै जाने स्थानीय बताउँछन् ।

प्रहरीले आगलागीको कारण पत्ता लगाउन अनुसन्धान थालेको छ । विद्युत सर्ट भएर अर्थात् खानेकुरा पकाउँदा असावधानीका कारण आगलागी भएको वा घटनाको अन्य कुनै कारण पनि हुनसक्ने प्रहरीको भनाइ छ । ‘आगलागी कसरी सुरु भएको भनेर ठ्याक्कै कारण पत्ता लाग्न सकेको छैन,’ लामिछानेले भने ।

घरहरुमा आगो लाग्न सुरु भएपछि घरभित्र रहेका ग्यासका सिलिन्डर विस्फोट भएका थिए । सिलिन्डर विस्फोट हुन थालेपछि आगो झन् तीव्र गतिमा फैलिएको थियो । प्रहरी र स्थानीयले बस्तीको बीचमा रहकेो एउटा घर भत्काएर आगो थप फैलनबाट रोकेका थिए ।

‘आगोले भेट्नै लागेको एउटा घर भत्काएपछि त्यहाँबाट आगो थप फैलिन पाएन । आगलागी र सिलिन्डर विस्फोट भइरहेका बेला ठूलो जोखिम मोलेर त्यति काम गर्न सकियो,’ घटनास्थलमा रहेका एक जना प्रहरीले भने । ती प्रहरीका अनुसार पीडितलाई खाद्यान्न, लत्ताकपडा र अस्थायी बसोबासको आवश्यकता छ ।

मुसहर समुदाय नेपालभित्रै सामाजिक, आर्थिक तथा शैक्षिक हिसाबले निक्कै कमजोर समूहमा पर्छ । भूमिहीन, शिक्षा र स्वास्थ्य सेवामा कमजोर पहुँच, दैनिक ज्यालादारीमा जीवन यापन गर्ने परिवारहरु आगलागीबाट सबैभन्दा बढी प्रभावित भएका छन् ।

घटनाले उनीहरूको सामाजिक सुरक्षा र जीवनस्तर सुधारको आवश्यकतालाई प्रमाणित गरिएको स्थानीयको भनाइ छ । ४५ मिनेटभित्रै बस्तीका १० वटा घर खरानी भएको घटनाबाट पाठ सिक्दै असुरक्षित बसोबास, कमजोर आपतकालीन तयारी र विपन्न समुदायको जीवनशैलीलाई सुधार गर्नुपर्ने आवश्यकता देखिएको सरोकारवाला बताउँछन् ।

उनीहरुका अनुसार बूढीगंगाको मुसहर बस्तीको आगलागीले ठूलो मानवीय संकट निम्त्याएको छ । आगलागीबाट प्रभावित बनेका परिवारलाई राहत र सुरक्षित आवासको व्यवस्था तत्काल गर्नुपर्ने माग उनीहरुको छ ।

तपाइको प्रतिक्रिया
कोशी र गण्डकीका हिमाली क्षेत्रमा वर्षा र हिमपातको सम्भावना
स्थानीय निर्वाचनको तयारीमा एमाले, ३ हजार ४१४ नेता–कार्यकर्तासहितको राष्ट्रिय भेला
यस्तो छ विदेशी मुद्राको विनिमय दर
यस्तो छ विदेशी मुद्राको विनिमयदर
पटकाको बारुद चुलोमा हाल्दा जलेर सुनसरीका बालक घाइते
अस्पतालको आशामा जग्गा दिए, नबनेपछि मुख्यमन्त्री कार्यालय अगाडि आमरण अनशन
भुटानी शरणार्थी र राजनीतिक बन्दीको विषय उठाउन आग्रह
भन्सार छली सुन लैजान खोज्ने चिनियाँ नागरिक पक्राउ
खराब मौसमले विराटनगरका बिहानका सबै उडान रद्द, सयौँ यात्रु प्रभावित
इनम सापकोटा प्रकरणमा सरकारको अनुसन्धानमाथि पोखरेलको प्रश्न
कनकाईमा आगजनीबाट दुई कुन्यूको धान र पराल नष्ट
© 2024 Muluki Khabar. All Rights Reserved. Design & Develop By: Indesign Media Pvt. Ltd.