विश्वविद्यालयबाट राजनीति हटाउन निर्देशन

काठमाडौं । प्रधानमन्त्री बालेन्द्र शाह (बालेन)ले विश्वविद्यालय र शैक्षिक संस्थाभित्र रहेका दलीय विद्यार्थी तथा कर्मचारी संगठनका संरचना तत्काल हटाउन उपकुलपतिहरूलाई निर्देशन दिएका छन् ।

प्रधानमन्त्री तथा मन्त्रिपरिषद्को कार्यालयमा उपकुलपतिहरूसँग भएको छलफलमा उनले शैक्षिक संस्थालाई राजनीति मुक्त बनाउने निर्णय कुनै पनि हालतमा कार्यान्वयन गर्नुपर्ने स्पष्ट पारे । उनले क्याम्पस, विद्यालय र अस्पतालजस्ता स्थानमा दलगत प्रभाव र राजनीति स्वीकार्य नहुने भन्दै राजनीति गर्न चाहनेहरूले पेसागत जिम्मेवारी त्याग्नुपर्ने बताए ।

केही उपकुलपतिहरूले संगठन हटाउने क्रममा धम्की र असुरक्षाको समस्या आएको गुनासो गरेपछि प्रधानमन्त्रीले आवश्यक सुरक्षा उपलब्ध गराउने प्रतिबद्धता जनाए । साथै, शैक्षिक क्यालेन्डर कडाइका साथ लागू गर्न र परीक्षा नतिजा एक महिनाभित्र सार्वजनिक गर्न पनि निर्देशन दिइएको छ ।