इरान यात्रा नगर्न दूतावासको आग्रह

एजेन्सी । इरानमा रहेका भारतीय नागरिक तथा त्यहाँ जान योजना बनाइरहेकाहरूप्रति भारतीय दूतावासले नयाँ ट्राभल एडभाइजरी जारी गर्दै इरान यात्रा नगर्न आग्रह गरेको छ ।

दूतावासले हालै भारत र इरानबीच केही हवाई उडान पुनः सञ्चालन हुने चर्चा चलिरहे पनि त्यसलाई आधार बनाएर यात्रा नगर्न स्पष्ट चेतावनी दिएको हो । जारी विज्ञप्तिमा क्षेत्रीय तनाव, हवाई क्षेत्रको प्रतिबन्ध र सञ्चालनसम्बन्धी अनिश्चितताका कारण अन्तर्राष्ट्रिय उडानहरू प्रभावित भइरहेकाले यात्रामा उच्च जोखिम कायम रहेको उल्लेख गरिएको छ ।

Advertisement

दूतावासले पहिले जारी गरिएको यात्रा सल्लाहलाई नै निरन्तरता दिँदै हवाई मार्ग होस् वा स्थल मार्ग, कुनै पनि माध्यमबाट इरानतर्फ यात्रा नगर्न भारतीय नागरिकलाई पुनः आग्रह गरेको छ । साथै, हाल इरानमा रहेका भारतीय नागरिकहरूलाई दूतावाससँग नियमित सम्पर्कमा रहन र सम्भव भएमा तोकिएका सुरक्षित स्थल मार्ग प्रयोग गरी देश फर्कन सुझाव दिइएको छ ।

मध्यपूर्व क्षेत्रमा पछिल्ला महिनाहरूमा देखिएको अस्थिर सुरक्षा अवस्था र त्यसले निम्त्याएको हवाई तथा यातायात अवरोधका कारण यस्तो चेतावनी दिइएको हो । दूतावासले परिस्थितिलाई निरन्तर निगरानी गरिरहेको बताउँदै आवश्यक परे थप सूचना जारी गरिने जनाएको छ ।