विद्यार्थीको प्रदर्शन

काठमाडौं । त्रिभुवन विश्वविद्यालय कीर्तिपुरमा विद्यार्थी संगठनहरूले सरकारको विद्यार्थी युनियन खारेज गर्ने तयारीविरुद्ध मंगलबार विरोध प्रदर्शन गरेका छन् ।

शासकीय सुधारसम्बन्धी प्रस्तावमा विद्यार्थी संगठन खारेज गर्ने बुँदा समावेश भएको भन्दै विभिन्न विद्यार्थी समूहहरूले संयुक्त रूपमा मार्चपाससहित प्रदर्शन गरेका हुन् । प्रदर्शनकारी विद्यार्थीहरूले विश्वविद्यालय परिसरमा प्लेकार्ड र नारासहित सरकारको कदमको विरोध गरेका थिए ।

उनीहरूले ‘स्ववियु खारेज गर्न पाइँदैन’, ‘विश्वविद्यालयको स्वायत्तता सुनिश्चित गर’, ‘शिक्षा विधेयक तत्काल ल्याऊ’, ‘विश्वविद्यालयमा प्रहरी होइन प्राध्यापक पठाऊ’ जस्ता नारा लगाएका थिए । विद्यार्थीहरूले बढ्दो महँगी नियन्त्रण गर्नुपर्ने, शैक्षिक संस्थालाई व्यवसायीकरण गर्ने प्रवृत्ति रोक्नुपर्ने, मेरिटोक्रेसी लागू गर्नुपर्ने र विद्यार्थीलाई उपलब्ध यातायात भाडा छुट कायम राख्नुपर्ने माग पनि अघि सारेका छन् ।

अखिल (क्रान्तिकारी)का उपाध्यक्ष मदन ढकालले विद्यार्थी युनियन खारेज गर्ने कुनै पनि प्रयास स्वीकार्य नहुने बताए । उनले सरकार मागप्रति गम्भीर नभए अझ कडा आन्दोलनका कार्यक्रम घोषणा गर्ने चेतावनी दिए ।

साथै, उनले विद्यार्थी संगठनहरूले आगामी दिनमा देशभरका क्याम्पसहरूमा विरोध कार्यक्रम विस्तार गर्ने बताएका छन् । विद्यार्थीले ऐतिहासिक रूपमा परिवर्तनका आन्दोलनमा भूमिका खेलेको संगठनलाई कमजोर पार्ने प्रयासले शैक्षिक वातावरणमै नकारात्मक असर पार्ने बताएका छन् ।