यूएईमा ट्यांकरमा हमला, होर्मुज तनाव चर्कियो

एजेन्सी । संयुक्त अरब इमिरेट्सको फुजैराहस्थित तेल बन्दरगाहमा सरकारी ट्यांकरमाथि आक्रमण हुँदा आगलागी भई तीन जना घाइते भएका छन् । यूएईको परराष्ट्र मन्त्रालयका अनुसार आक्रमणपछि ट्यांकरमा ठूलो क्षति पुगेको छ । घाइतेहरूको उपचार भइरहेको छ ।

यूएईले आफ्नो हवाई प्रतिरक्षा प्रणालीमार्फत १२ वटा ब्यालिस्टिक क्षेप्यास्त्र, तीन वटा क्रुज मिसाइल र चार वटा ड्रोन नष्ट गरेको जनाएको छ । घटनालाई ‘गम्भीर खतरा’ भन्दै उसले आवश्यक परे प्रतिकार गर्ने चेतावनी दिएको छ ।

Advertisement

आक्रमणमा इरानको संलग्नता भएको आशंका गरिएको भए पनि इरानी पक्षले त्यसलाई अस्वीकार गरेको छ । इरानी अधिकारीहरूले यूएईलाई लक्षित कुनै योजना नरहेको बताएका छन् ।

घटनापछि अन्तर्राष्ट्रिय बजारमा कच्चा तेलको मूल्य प्रतिव्यारेल ११५ अमेरिकी डलर नाघेको छ । खाडी क्षेत्रको अस्थिरताले ऊर्जा आपूर्तिमा असर पार्न सक्ने चिन्ता बढेको छ ।

यसैबीच, होर्मुज जलडमरूमध्य क्षेत्रमा अमेरिका र इरानबीच तनाव बढेको छ । अमेरिकी राष्ट्रपति डोनाल्ड ट्रम्पले ‘प्रोजेक्ट फ्रिडम’ अभियानमार्फत अलपत्र जहाजहरूलाई सुरक्षित निकाल्ने प्रयास भइरहेको बताएका छन् ।

सो क्रममा अमेरिकाले इरानका सातवटा साना डुंगामाथि आक्रमण गरेको दाबी गरेको छ । तर, इरानले त्यसलाई अस्वीकार गरेको छ । यसबीच ‘एलायन्स फेयरफ्याक्स’ नामक एक अमेरिकी झण्डावाला जहाज सुरक्षित रूपमा जलडमरूमध्य पार गर्न सफल भएको जनाइएको छ ।

हाल उक्त क्षेत्रमा हजारौं जहाज र नाविकहरू प्रभावित रहेका छन् । समग्रमा यूएईको ट्यांकर आक्रमण र होर्मुज क्षेत्रमा बढ्दो सैन्य गतिविधिले खाडी क्षेत्रको सुरक्षा अवस्था थप अस्थिर बनाएको छ ।