ट्रम्पको नयाँ घोषणाले राहत

एजेन्सी । अमेरिकी राष्ट्रपति डोनाल्ड ट्रम्पले रणनीतिक रूपमा अत्यन्त संवेदनशील मानिएको हर्मुज जलमार्गमा फसेका तेल ट्यांकरहरूलाई सैन्य सुरक्षा घेरामा बाहिर निकाल्ने ‘प्रोजेक्ट फ्रिडम’ तत्कालका लागि स्थगित गर्ने घोषणा गरेका छन् ।

उनको नयाँ घोषणाले विश्व बजारमा केही राहत महसुस गरिएको छ । इरानसँग भइरहेको अनौपचारिक वार्तामा सकारात्मक प्रगति देखिएको र सम्भावित कूटनीतिक सम्झौताको सम्भावना बलियो बनेको भन्दै ट्रम्पले यो निर्णय लिएको बताइएको छ ।

Advertisement

यसअघि अमेरिकी सेनाले करिब १५ हजार सैनिक, युद्धपोत, लडाकु विमान र ड्रोन परिचालन गर्दै ठूलो स्तरको सुरक्षा अभियानको तयारी गरेको थियो । तर, इरानले आफ्नो जलक्षेत्रमा विदेशी सैन्य प्रवेश भए कडा प्रतिकार गर्ने चेतावनी दिएपछि स्थिति झन् जटिल बनेको थियो ।

ट्रम्पका अनुसार हाल वार्ता नै प्राथमिकतामा राखिएको छ र सैन्य विकल्पलाई केही समयका लागि रोकिएको हो । अमेरिकी विदेश मन्त्रालयले केही स्थानमा सीमित एस्कर्टिङ जारी रहेको जनाएको छ । पूर्ण सैन्य अपरेसन रोकिएको संकेत दिएको छ ।

यसैबीच, हर्मुज तनावका कारण विश्व तेल आपूर्ति प्रभावित हुँदा ऊर्जा बजारमा अस्थिरता देखिएको थियो । ट्रम्पको निर्णयले तत्काल बजारमा राहत दिने तर दीर्घकालीन समाधान कूटनीतिक सम्झौतामै निर्भर रहने बताइएको छ ।