युद्ध रोक्न इरानको आग्रह

एजेन्सी । इरानले मध्यपूर्वमा जारी युद्ध अन्त्य गर्न, अमेरिकी नौसैनिक नाकाबन्दी हटाउन र विदेशमा रोक्का गरिएको आफ्नो सम्पत्ति फुकुवा गर्न अमेरिकासँग माग गरेको छ ।

इरानी विदेश मन्त्रालयका प्रवक्ता इस्माइल बकाईले इरानले कुनै विशेष छुट नभई आफ्नो वैधानिक अधिकार मात्र खोजेको बताएका छन् । उनका अनुसार वर्षौंदेखि विदेशी बैंकमा रोकिएको इरानी जनताको सम्पत्ति तत्काल फुकुवा हुनुपर्छ ।

Advertisement

अमेरिकी राष्ट्रपति डोनाल्ड ट्रम्पले युद्ध अन्त्यसम्बन्धी इरानको प्रस्ताव अस्वीकार गरिएको बताएका छन् । इरानले खाडी क्षेत्रमा युरोपेली देशहरूलाई थप तनाव निम्त्याउने गतिविधिमा संलग्न नहुन चेतावनी दिएको छ । बकाईले ‘स्ट्रेट अफ होर्मुज’मा कुनै पनि हस्तक्षेपले अवस्था झन् जटिल बन्ने बताएका छन् ।

बेलायत र फ्रान्सले उक्त जलमार्ग सुरक्षित गर्न अन्तर्राष्ट्रिय गठबन्धन बनाउने प्रयास गरिरहेका छन् । तर, अमेरिका–इरानबीच शान्ति सम्झौता भएपछि मात्रै त्यो सम्भव हुने बताइएको छ ।

इरानले खाडी क्षेत्रमा देखिएको सम्पूर्ण अस्थिरताका लागि अमेरिकी उपस्थितिलाई दोष दिएको छ । साथै, खार्ग टापु नजिक तेल चुहावट भएको दाबीलाई अस्वीकार गर्दै तेहरानले वातावरणीय क्षतिप्रति आफू गम्भीर रहेको जनाएको छ ।